Shillong, Nailur 09: Ka Confederation of Ri Bhoi People (CoRP) lyngba u Vice President bah Gershome Hat ka dawa ba ka tnad PWD ka dei ban maramot noh mardor ia ka iing shongthait ne Rest House ha Iew Mawroh kaba hap hapoh Hima Jirang, Ri Bhoi District.
Ka seng ha ka jingleit jurip dang shen ka lap ba kane ka Rest House jong ka tnad PWD ka la kylla kum ka sem blang bad ka la jot lut naduh ki jingkhang iit, jingkhang bah bad ka tnum jong ka iing shet ja ka la hap sha madan namar bym don ki nongpeit nongsumar la bun bun snem.
Kane ka pynpaw ia ka jingkhein sting ka tnad PWD haduh ba kane ka iing sorkar ka kylla iing jot bad kylla ktem sniew namar ka don ha khappud bad ka jylla Assam.
Kumta ka tnad PWD ka dei ban shimkhia ban pynbha noh khnang ba ki briew na jylla Meghalaya kiba leit donkam ha katei ka thain kin ioh jaka shongthait bad kan long ruh kum u Mawpud hapdeng ka Meghalaya bad Assam.
Na ka liang ka seng ka pynpaw lada ka tnad PWD ka pynbha bad pynitynnad ia katei ka iing kum ka ‘Rest House ne Inspection Bungalow’ kan ioh shibun ki jingmyntoi, namar ki don bun ki nongleit nongwan na jylla bad na Assam kiba wan shangkai lyngba ka surok MMR Road hadien ba shna pynheh ia ka surok naduh Rani Godown haduh Mairang, Eastern West Khasi Hills.
