Shillong, Nailur 12: Ka seng Hynniewtrep Youth Council(HYC) ha poh ka jingialam u President rangbah u bah Roykupar Synrem mynta ka sngi ka 12 tarik u Nailur 2024 ki la wan ban ialum ha khmat ka khyrdop treikam ka Shillong Press Club.
Kane ka jingwan ka long ban pyrshah halor ka jingwan ban ai press Conference jong ka kynhun u Jagadguru Shankaracharya Avimukteshwaranand Maharaj of Jyotirmath Jyotirmath ia kaba ka HYC kala ioh jingtip ba kane ka kynhun kan pyrshah jur ban pyniap bad ban bam doh ia ki masi.
Ka HYC haba kala ioh jingtip ba katei ka kynhun kan wan kren ban ai jingpynbna ha ki nongthoh khubor, kumta kila ia wan ban ialum hakhmat ban iakren bad katei ka kynhun. Hynrei ki pulit bad u Majistor kila wan poi ban pynjur ia ka jingpahara ban peit ba kan ym mih kano kano ka huri hura.
Hynrei hadien ba ki nongialam ka Shillong Press Club kila ioh iakren bad katei ka kynhun ban pynlong ia ka Press Conference ba kila pynthikna ba kin ym lah ban pynlong shuh ia ka Press Conference kumta ki dkhot ka HYC ruh kila ia pra noh na katei ka jaka.
Ha ka jingiakren bad ki nongthoh khubor na ka liang u bah Roykupar Synrem ula mahan tyngeh ba lada katei ka kynhun kan wan pynlong ia ka rally ban ialap sangeh bam doh masi ne ban kheiñ kordor ia ka masi, na ka liang ka seng ha kajuh ka Sngi kan pynlong da ka rally bam doh masi.
Ula ong, ba ka jingwan jong ka HYC hajan ka Shillong Press Club kam dei ban thaw jingkulmar hynrei kadei ban ia kynduh iaki nongialam ka ‘Jagatguru Shankaracharya Ji Maharaj’ ban pynsngewthuh ba 95% ki nongshong shnong ka Meghalaya ki bam doh Masi.
U Bah Roy Kupar ula ong ruh ba ka seng kala buddien ia katei ka kynhun bad kadei hi ka kynhun kaba leit sha kiwei pat ki jylla ka thain̈ shatei lammihngi ban pyrshah ban bam doh masi.
