Shillong, Nailur 12: Ka North East Students’ Organisation (NESO) ka seng ki samla pule ka thain shateilam mihngi ka Ri India mynta ka sngi ka 12 tarik u Nailur 2024 ka la phah da ka shithi sha u Myntri Rangbahduh ka Ri u Narendra Modi bad kumjuhruh sha u Myntri ki kam pohiing u Amit Shah.
Kane ka jingthoh ka long ban pynkut noh ïa ka jingsngap jar ka jongu bad ban leit jngoh ïa ka jylla Manipur, kaba la sakhi ïa ki jingïakynad bad jingiaumsnam kaba la neh mynta la 16 bnai.
Ha ka shithi ba la soi da u Chairman ka NESO U bah Samuel B Jyrwa kila dawa ba dei ban thung mardor ia ka High Level Peace Committee kaban kynthup ïa ki nongmihkhmat na baroh ki jaitbynriew ban wanrah ia ka jingiapynbeit kaban neh ha ka jylla Manipur.
Ha ka shithi ka NESO ka la kyntu ruh ia u Myntri Rangbahduh ka ri ban pynkut noh ia ka jingsngap jar ka jongu bad ban leit jngoh ïa ka Manipur ban bishar hi dalade ha madan ïa ka jinglong jingman bad ban ai jingïada ïa ki riewpaidbah jong baroh ar ki jaidbynriew khamtam ïa ki kynthei bad ki khynnah kiba la shah ktah na katei ka jingiakynad.
Ka NESO ka la pynpawruh ba ka jingsngap jar kaba la neh slem jong u Myntri Rangbahduh ka ri, u bym shym la leit ruh sha Manipur naduh ba la mih katei ka jingiakynad, kala nang pynjur ia ka jingshem jingeh bad jingjynjar.
Ka jingbym don ia ka jingkhlain, ki nongialam ba ka jingtuklar kaba mardor kala ailad ia katei ka jingiakynad ban nang jur bad kala nang kiew ka jingiaumsnam bad ki paidbah kila nang mad ia ki jingjynjar.
U bah Jyrwa u la ongruh ba ka jinglong jingman ha Manipur kala nang sniew bad ka dawa ban shimkhia mardor na ki kyrdan kiba ha khlieh duh jong ka sorkar.
Ka jingbym lah ban pynbeit ia ka jingiakynad kam pynthud tang ia ka jinglong skhem jongka sorkar Manipur hynrei kala buh ruh ha ka jingma ia ka jingsuk bad jingshngain ha ka thain shatei lammihngi baroh kawei.
Ka NESO ka kyntu ia ka Sorkar India ban leh eiei noh mardor bad ban shim ïa ki sienjam ban wanrah biang ïa ka jingsuk jingshngain ha ka jylla.
Ka NESO ka pynrem jur ïa kine ki kam iaumsnam namar ki pynsniew bad ki long pyrshah ïa ki nongrim jong ka longbriew manbriew, jingsuk bad ka jingïalong kawei.
Ka jingjur jong ki kam thombor, kynthup ïa ki jingjia ba la mih khubor dang shen, shaphang ki kam thombor da ki Drone bad ki Missile, kala nang pynsniew shuh shuh ïa ka jinglong jingman.
Kine ki buit kim pynjur tang ia ka jingpynjot hynrei ki pynngam jylliew ruh ia ka jingphiah hapdeng ki jaidbynriew, ban pyneh ban ioh biang ia ka jingsuk. Ka NESO ka ieng bad kito baroh ki riewshimet bad ki longiing longsem kiba la shah ktah bad ka sngewsih ruh halor ka jingduh noh ia ki mynsiem ba lui-lui.
