Shillong, Nailur 17: Ka Dr M Ampareen Lyngdoh kaba dei ka Myntri ka tnad ka Koit ka khiah mynta ka sngi ka 17 tarik u Nailur 2024 kala ban jur ba ki samla pule kiba leit pule MBBS na ka bhah pule ka Sorkar Jylla, kin hap wan phai sha Meghalaya ban shakri ia ka Jylla hadien ba ki pyndep ia ki jingpule.
Ha ka jingia kren bad ki nongthoh khubor ka Dr M Ampareen Lyngdoh kala kren halor ka jingduna jong ki doktor specialist hapoh ka Jylla bad ban jur ia ka jingdonkam ban pynurlong ne pyntreikam ia ki kyndon jong ka jingiateh bond ban leit pule ia ki kyrdan pule bala bei pisa da ka Sorkar.
Ka Myntri kala pynpaw ia ka jingsngewkhia halor ka jinglong mynta ba bun ki samla ba pass MBBS kim shym la wanphai shuh sha Jylla hadien ba ki pyndep iala ki jingpule bad kular ba ka Sorkar kan sa leh eiei halor kane ka bynta ban pynthikna ba kine ki samla kin burom ia ka jingiateh kular.
Ka Mynti ka Tnad ka koit ka khiah ka la ongruh ba ka long ka ba kongsan ba baroh ki samla pule doktor kiba ioh leit pule na ka bhah ka Jylla Meghalaya ba ki dei ban wan phai pat shala ka jong ka Jylla.
Ha ba jubab halor ki daw ba ki samla ki ba ioh ban leit pule na ka bhah sorkar kim wan phai shuh sha ka Jylla ka Myntri ka la pyntip ba ka Jylla Meghalaya haduh mynta kam pat don satia ia ka Medical Council bad kane ka dei ka jingeh ba nyngkong duh.
Ka la ong ruh ba na ka liang ka tnad ka la dep ban iakren bad iamir jingmut bad ka Tnad Ain ban bishar bad jngoh bniah biang ia ka bond policy ban lah pynthikna ba ki doktor bad ki samla pule kin wan phai ban shakri ia ki paidbah ka Jylla.
Ka Myntri kala pyntip ruh ba ka ka batch ba nyngkong jong ki samla ban pule doktor ha Meghalaya kan sa sdang ha u snem 2025, kum shibynta jong ka jingpyrshang jong ka Sorkar ban pynkhlain iaka jingdon doktor ha Jylla.
