Shillong, Nailur 19: Ka lahduh jong ka 133rd Durand Cup 2024, ka NorthEast United FC ka la wan ïuhkjat ha nongbah Shillong mynta ka sngi ka 19 tarik Nailur ha ryngkat bad ka Durand Cup Trophy.
Ha kane ka sngi ka klob, ha ryngkat ka jingkyrshan na ka tnat Sports jong ka Sorkar Jylla Meghalaya, ka Meghalaya Football Association bad ka Meghalaya Tourism ka la pynlong ruh ïa ka Open Training & Media Day na bynta ki kynhun lad pathai khubor ha Shillong.
Kum ka jingai khublei ka klob ka la ailad ruh ïa ki nongkyrshan kiba la wan tuid ha JN Stadium, Polo, ba kynthup naduh ki khynnah skul ba kin ïakynduh bad ki rangïalehkai ka NorthEast United FC.
Ha kane ka sngi la ïadon ryngkatlang u Myntri Rangbah ka Jylla – u Conrad K Sangma, bad ka Kong Isawanda Laloo, IAS-Secretary jong ka tnat Sports, u Juan Pedro Benali – Head Coach ka NorthEast United FC, Mandar Tamhane-CEO jong ka NEUFC, ki player jong ka klob lem bad kiwei.
Haba ai jingkren sha ki lad pathai khubor, u Juan Pedro Benali, Head Coach jong ka NorthEast United FC u la pynpaw ba ka klob ka sngew ba ki dei na kane ka jaka (Shillong).
U la kdew ba ka kynhun ka dang kiew, bad ka jingthmu ka long ban ïoh ïa ka kynhun kaba khlaiñ bad ban long ka lahduh. Shuh shuh u la kyntu ïa ki paidbah ba kin long kiba ïaishah, ban kyrshan ym tang ban kynthoh, namar ka shimpor ïa ka kynhun ba kan poi sha ka thong.
Hooid ka Durand Cup ka ïarap shibun ïa Ngi ban sngewthuh ïalade, ban tip ba Ngi hap ban ïai trei shitom ban pynjanai ym ban bteng ïa ki jingbakla. Ngi kwah ban long ka nuksa ïa baroh ki khynnah samla, ban long ka thong na bynta ki khynnah, da ka jingdon jong ki player kiba trei shitom, kiba mihkhmat ïa kane ka klob jong 8 tylli ki jylla ka thaiñ shatei lammihngi (North East), ka ban pynlong ïa ki samla ban kwah ban tyngshaiñ lem”
Na ka liang jong u Mandar Tamhane-CEO jong ka NorthEast United FC u la pynpaw ka jingsngewnguh ïa ki nongkyrshan kiba la pynlong ïa ka klob ban wan biang ha kane ka nongbah ban wan ïakynduh bad ki.
U la kren ruh ïa ka phang ba ka klob kan pynthikna ban thaw ïa ki lad ban sei ïa ki player na baroh 8 tylli ki jylla kane ka thaiñ bad mynta ka klob ka dang wad ïa ki player na bynta ka kynhun U-17 bad Reserved Team , ha kaba 23 ngut ki player ki la don bynta bad ka kynhun.
U la bynrap ba da ka jingkyrshan na ka Sorkar Jylla Meghalaya, ka nongbah Shillong shen kan sa lah ban pynlong ki jingïalehkai Indian Super League, da kaba pynkut ba ka Shillong ka lah ruh ban kylla long kawei na ki jaka pdeng kaba paw ha ka phutbol hapoh ka ri.
