Shillong, Nailur 24: Ka Khasi Students’ Union, Employment and Monitoring Cell ha ka 24th, Nailar, 2024 ka lah leit ban buh jingujor hakhmat ka Kong N Nongkynrih, Director jong ka Directorate of Forensic Science halor ka jingkhot aplikeshon lyngba ka Meghalaya Public Service Commission ka ba lah pynlait paidbah ha ka 19 tarik Nailar 2024.
Ka jinglait ki post Scientific Officer, Senior Scientific Assistant bad Scientific Assistant in the Mobile Forensic Crime Scene Unit ha kaba na ka liang ka Directorate ka lah iaid lait na ka Schedule II jong ka Rule 8 ka Meghalaya Forensic Laboratory Service Rules 2021 da kaba buh kyndon ba ki nongaplai ki dei ban pyndep iaka M.Sc ha ka Forensic Science.
Katkum ka rule, kino kino ki lah kandidet kiba la pyndep ia ka M.Sc ha kano kano ka stream jong ka science ki lah ban aplai ia kine ki posts, hynrei ka Directorate ka pynkylla ia kane khlem da don kano kano ka kyndon ba biang.
Kane ka jingleh na ka liang ka Directorate ka wanrah iaka jingkhanglad iaka hok ki Samla ki ba pass iaka M.Sc nakiwei pat ki subjects, katba ka Services Rule bad kiwei ki Directorate jong ki Jylla bapher bapher ki shah ia ki ban aplai.
Ha kane ka jingiakren na ka liang ka Director ka lah iathuh ba kane ka jingpynkylla ka dei lynba ka jingbthah ktien u Secretary ka Home Department kaba la pynlyngngoh iaka Seng ba kumno kat ka Directorate ka dang hap ban pdiang iaka jingbthah ktien na ki ba nalor haba iadei bad kano kano ka jingpynkylla thymmai iaka rukom treikam.
Ka Seng kam lah ban pdiang dalei lei iakane ka jingleh daka Directorate ban iaid lait naki kyndon thungkam ba lah don lypa, kaba long ka jingkhanglad iakiwei ki samla wad kam wad jam, bad kumjuh kane ka jingleh ka pyni ba ka don ka jingpyrshang ban pynhun iaki heh sorkar ha ka jingpynrung kam dakaba iaid lait iaka Services Rule.
