Shillong, Risaw 02: Ha ka: 02 tarik u Risaw 2024 ha ka por 6:41 bajemynmiet da ka PIB Shillong, Ka Raj Bhavan Shillong ka la sakhi ia ki paidbah kiba wan sha kane ka jaka naduh 5 baje mynstep mynta ka sngi haba ki nongmareh ha ki rta bapher bapher ki la poi ban kyntiew kyrteng ialade na ka bynta ka 5.5 km Swachhata Run hapoh ka Swachhata Hi Seva ban rakhe ia ka Gandhi Jayanti.
Palat 1500 ngut ki briew na Shillong ki la iashim bynta mynta ka sngi ha ka Swachhata Run ba la pynlong da ka Raj Bhavan bad Central Bureau of Communication (CBC) Shillong ha ka jingiatreilang bad ka tnad kam ialehkai jong ka East Khasi Hills, Sorkar Meghalaya.
U Lat ka jylla, C. H. Vijayashankar u la pliepaidbahia kane ka jingiamareh. Kane ka Swachhata Run mynta ka sngi ka dei kaba la pynlong da ka jingthmu ban ai jingtip ia ki briew shaphang ka jingkhuid bad ban kyntiew ia ka Swachhata Hi Seva jong ka Sorkar Pdeng, la ong u Lat. U la iaroh ia ka jingbun ki briew kiba wan iashim bynta wathapeng ka jingther u slap.
Ka 5.5-km Swachhata Run ka la sdang na Raj Bhavan, lyngba ka St. Anthony’s College, Shillong College, St. Mary’s College, Don Bosco Square, Iew Laitumkhrah, Fire Brigade, St. Edmund’s School, Malki Point, Barik Point, Civil Hospital, Main Secretariat, DC Office bad ka la kut ha Raj Bhavan, Shillong.
Ha ka Open Category (Shynrang), u Daniel L Walang, NahteiWangnao bad DasamanKhyndait ki la wan ha ka kyrdan ba nyngkong, ba ar bad ba lai, katba ha ka Open Category (Kynthei), ka MarqueenlessRamsiej, PhyrnaiKhyndait bad DaplissWahlang ki la wan ha ka kyrdan ba nyngkong, ba ar bad ba lai.
U Daniel L Wahlang u la pyndep ia ka jingmareh ha ka por 17.15 minit katba kaMarqueenlessRamsiej u la pyndep ha ka 22.25 minit. La sam ruh ia ki khusnam sha ki nongmareh kiba la palat 50 snem ka rta.
Hadien kane ka Swachhata Run ka la don ka jingthungdieng hapoh ka EkPedMaaKeNaam, ha kaba u Lat u la thung ia ki tynrai dieng ha Nan Palok bad Raj Bhavan. Kane ka kam ha kylleng ka ri ka thmu ban iada ia ka mariang bad noh synniang sha ka lawei kaba kham khuid bad kaba kham bun ki jingthungjingtep.
Ha ka jingrakhe Gandhi Jayanti ha ka Durbar Hall ha kane ka juh ka sngi, u Lat u la leit buh syntiewna ka bynta u Mahatma Gandhi bad LalBahadurShastri ha ka lyngkhuh sngi kha jong ki.
U Lat u la sam ruh ia ki cheque kiba T 1, 11,000 ka jingai jingiarap pisa ia saw tylli ki Gandhi Kendra – Laitkroh Kasturba Gram Seva Kendra, Tuber Kasturba Gram Seva Kendra, Jambal Kasturba Gram Seva Kendra bad Magupara Kasturba Gram Seva Kendra kum shi bynta ka Gandhi Jayanti.
Ha ka jingai jingsngewnguh ia ki nongtei ia ka ri, Mahatma Gandhi bad LalBahadurShastri, u Vijayashankar u la ong ba ngi ioh mynsiem ban pynurlong ia ka jingthmu ia ka India jong u Gandhi bad kiwei kiwei ki riewpawkhmat jong ka ri.
U la ong ba u kmen ban iohiia ka jingbun ki briew na Meghalaya kiba la wan sha ka Raj Bhavan ha kane ka sngi. U la ong ba yn dang pynlong shuh shuh kine ki jait prokram ha ki sngi ban wan ha Raj Bhavan ki ban ai jingmyntoi ia ki briew.
Ka Editor jong ka The Shillong Times, Kong Patricia Mukhim ka la ai jingkren ha kane ka sngi. Ka la iarohia ki sienjam jong ka Raj Bhavan ban pynlong ia kane ka prokram ban rakhe ia ka Swachhata Hi Seva bad Gandhi Jayanti. Ka la ban jur halor ka jingpyniasohia ka jingkhuid bad ka jingim ba man ka sngi bad ki rukom ha ka deiriti, ka ba pynshlur ia ka jingpeit ia ka Swachhata kaba long shi bynta jong ka jingim ba man ka sngi.
Ka la ong ba dei ban rakhe ia ka SwachhataDiwas baroh shi snem khnang ba baroh ki peit bniah ia ka jingkhuid bad ka wan ka rukom treikam jong baroh kawei ka imlang sahlang ha kaba baroh ki don bynta ha ka jingkhuid.
U Lat u la sam ia ki khusnam bad ki syrnot ia ki nongjop jong ka jingiakhun thoh essay bad jingiakhundrojingdro ba la pynlong da ka CBC Shillong, National Book Trust of India (NBT) ha ka jingiatreilang bad ka District Education Office, halor ki phang Swachhata and Poshan (nutrition) kaba la pynlong hapdeng ki khynnah skul jong ka East Khasi Hills.
Shuh shuh, u Lat u la pyllait paidbah ia ka Mobile Library jong ka National Book Trust na Raj Bhavan. Kane ka dei shi bynta ka prokram mobile book exhibition kaba wanrah ia ki kot sha ki jaka ba jynjar ban poi, ki jaka nongkyndong jong ka ri.
Ka National Institute of Fashion Technology (NIFT) Shillong bad ka tnad Sericulture jong ka jylla ruh ki la pyni ia ki jain bad kiwei kiwei ki tiar kiba pyndonkam ha ka kam thain jain bad ruh ki jainKhadi ha kane ka sngi.
U Myntri ka Sorkar Meghalaya ba dei khmih ia ka tnad Animal Husbandry and Veterinary, Bah AL Hek bad kiwei kiwei ki ophisar jong ka Sorkar Jylla bad ka Sorkar Pdeng ki la iashim bynta ha kane ka prokram ba long baroh shi sngi.
