Shillong, Risaw 04: Ka Hynniewtrep Youth Council (HYC) ha ka sngi Palei ka la pynpaw ia ka jingpyrshah kaba jur halor ka jingpynrung ia ki briew na shabar ka jylla ban mihkhmat ia ka jylla Meghalaya kum ki nongialehkai ha ka All India Under-23 Col C.K. Nayudu Trophy na ka bynta ka Samoi 2024-2025 bad ka All India Senior Men Ranji Trophy.
Ha ka shithi sha u president ka Meghalaya Cricket Association (MCA), u president ka HYC u bah Roykupar Synrem u la ong ba ngi dawa ba ki dei ban weng noh ia ki kyrteng ki briew kiba na shabar ka jylla na ki thup kyrteng bad ban jied ha ka jaka jong ki ia ki nongialehkai ba dei hok na ka jong ka jylla.
U bah Synrem u la ong ba u Kevin S Christopher, u Abhishek Kumar, u P.M. U Santosh, u Sachin Kumar, u Rohit Kr Yadav bad u Raghav Magotra, kiba la shah jied ban mihkhmat ia ka jylla Meghalaya ha ka All India Under-23 u Col C.K. Nayudu Trophy na ka bynta ka samoi ïalehkai 2024-2025.
Katkum ka jingtip kim dei ki trai ri trai muluk na ka Jylla Meghalaya hynrei la jied ïa ki kum ki nongïalehkai trai ri . Kumjuh ruh u Arpit Bhatewara bad u Jaskirat Singh Sachdeva kiba la shah jied ban mihkhmat ïa ka Meghalaya ha ka All India Senior Men Ranji Trophy, ruh kim dei satia ki trai ri traimuluk na ka Jylla Meghalaya hynrei ki la shah jied kum ki nongïalehkai trai ri.
U bah Synrem ha ka shithi ba la phah sha ka MCA u la ong ba ka jingjied ïa ki briew ba la kdew haneng ban mihkhmat ïa ka Jylla Meghalaya watla kim dei ki trai shnong ka long kaba ngi pyrshah jur. Kane ka jingleh jong ka MCA ban ai jingmyntoi ia ki briew kiba nabar ka long ka jingduhnong jong ki nongialehkai kiba dei hok bad kiba don sap na ka thain bad kam long kaba lah ban pdiang satia bad kaba dei ban pynrem jur.
Ka long ka jingshisha ba kine ki briew kiba nabar ki la shim khia kynsan ban mihkhmat ïa ka Meghalaya tang hadien ba ka MCA ka la ïoh ïa ka jingïasoh kum ka dkhot ba pura jong ka BCCI ha u snem 2017-2018. Dei ki nongialehkai trai ri shwa u snem 2017-2018 kiba la pyni bad trei shitom na ka bynta ban buh ia ka Meghalaya Cricket ha ka kyrdan kaba ka don mynta.
