Shillong, Risaw 14: Ka Employment Monitoring Cell ka KSU WJHDU hapoh ka jingialam u Samla Laitphar Syngkrem President bad u Samla Leningrad Tariang General Secretary mynta ka sngi ka 14 tarik u Risaw 2024 ka la leit buh bad ai jingmut ia 17 tylli ki mat ban saiñdur thymmai iaka District Selection Committee ka district.
Ka nongrim jong ka jingleit ai jingmut bad dawa ka long ban don ka jingthung kam thung jam ba khuid wat ha ki district ruh lyngba ka DSC kaba dei ka statutory body ban leh iaki recruitment ha ki department ba pher bapher jong ka sorkar jylla hapoh ka district.
Ka seng ka la ioh ban pynsngew iakine ki 17 tylli ki mat kiba kynthup kaba nyngkong ka long naduh ka jingjied iaki dkhot ka DSC ba kim dei ban don liang ne kim dei ban shah liang bad ba ki dkhot ka DSC hi ki dei ban don noh ka qualification kaba biang.
Kaba ar ka long halor ka jing pyllait paidbah iaki jingdon jingem ki dkhot ka DSC ba la shah thung Kaba lai ka long ba ki nong aplai lane ki candidate ki dei ban long ki trai shnong ka jylla Meghalaya bad kiba la pliah ban kren iaka ktien kmie bad ktien Khasi ha ki jong ki district.
Kaba saw ka long ban pynduh noh iaka thung kam lyngba ka Ad hoc, Casual appointment bad ruh contractual halor ka nongrim na kum kine ki jait thung kam ka long kaba pyrshah iaka guideline ka Department of Personal Reform Govt of Meghalaya
Kaba san ka long ban pynduh shisyndon iaka personal interview ha ki post Grade B C bad D halor ka nongrim ba ka jingrung tuh lane thung kam bym khuid ka jur bha lyngba ka personal interview.
Kaba hynriew ka long halor ban pyni paidbah iaki marks jong ki nong apply kam halor ka nongrim ban wanrah iaka jingkhuid jingsuba haka thungkam bad ruh khamtam ba ka DSC hi kan lait na ka jingshah kynnoh.
Kaba hynniew ka long halor ki roll number jong ki nongthep kam kim dei ban kylla hapdeng ka thungkam, Kaba phra ka long halor ban ai da ki carbon copy jong ki kot thoh eksamin ki samla wad kam.
Kaba khyndai ban pyllait paidbah iaki answer key hadein ka exam hapoh ka por ba biang ba ki nongthep kam kin lah ban nujor bad aireng iaka answer key.
Kaba shiphew ka long halor ba ka jingthep kam lane recruitment yn pyndep hapoh 6 bnai naduh ba lah advertise iaki post. Kaba khatwei ban pynduh shisyndon iaka Personal interview haki post grade B,C bad D. Kaba khatar ka long halor ban ai iaka kaiphod lane annual report daka DSC.
