Shillong, Risaw 18: Mynta ka sngi ka 18/10/2024 ka KSU Narpuh Circle lem kiwei de ki sengbhalang kila pyrshah jur ia ka jingpynsngew paidbah jong ka kompany Meghatop Cement Ltd ba pynlong ha shnong Wahiajer Narpuh.
Ka seng naduh ba sdang hi kam juh pdiang ia kum kine ki jait hearing namar la sngewthuh kan pynjot thiaw ia ka mariang sawdong. Naduh kine ki sngi ba leit ka seng ka la buh jingthoh ha u Member Secretary Meghalaya State Pollution Control Board ban pyrshah jur ia katei ka jingthmu ban seng khar khana pynmih dewbilat ha katei ka shnong.
La sakhi da baroh ba ka jingdon kitei ki khar khana kumba mih tit lyiur ka wanrah ka jingduhnong kaba khraw ia ka thaiñ, kata ka long ka jingduhnoh ia ka mariang. Ki lum ki wah ki la syllen lut, ki um ki la jaboh lut bad ngin sa iohi ia ka jingjah rngai jong ki naba kin rngad noh baroh.
Ka jingdum kan tap ia ka pateng jong ki longdien jong ngi. Namar ka jingrhah spah jubor bad rit bad khraw ngi la iohi lypa ka jingjot kan lap ia ka pateng. Ka jingpynlong ia ka jingpynsgew paidbah kam long shuh kaba khuid, ka dei tang ka jingpyndep rukom, namar ia kiba kyrshan ki ioh rung katba kiba pyrshah kim ioh rung.
Ha ka jingpynbna paidbah ne ka Notification ngi iohi ba Meghalaya State Pollution Control Board ka khot paidbah sha ka hearing ban ioh pynsngew ia ki jingpyrshah ne jingkyrshan, hynrei kam long pat kumta.
Mynta ka sngi kila sngewthuh la ki tur ban thom da ka bor ia kiba pahara ha pdeng lynti khlempep ka long ka jingmynsaw ne um snam para khasi paradoh parasnam, katba u mynder u rkhie beiñ ia ka jingbiej jong ngi. Ah shaei ka lawei ka Jaitbynriew jong kane ka thaiñ kan poi.
Sa katno tylli ki karkhana dewbilat kin wan kjit ia ka spah jong kaba ki longshwa ki la buh kyrpang. Kine ki khar khana poiei ki wan ban pynjot ia ka jingdon jingem, ki kamai da ki spah klur bad shuh shuh ki wan ban pharia ia ka jingiadei jong ngi ki para nongshong shnong da kata ka ‘Divide and Rule Policy.
Haduh mynta u jong ngi um pat shai namar la dep tap da ki sbai rupa. Namar ka hearing kam long shuh kaba khuid kaba la iaid lait ia ki kyndon jong ka aiñ, kumta hap ban shim da kiwei ki sienjam ban ioh ka jingbishar ba hok.
U Blei uba stad u buh ia u Uranium ha South West Khasi Hill haba don ki riew shemphang bad ba pyrkhat na bynta ka lawei ka dong ka thaiñ bad ka Jaitbynriew. Ban jin lada u Uranium u don ha East Jaiñtia Elaka Narpuh katta la khuid phloiñ bad briew bad mrad.
