New Delhi, Risaw 30: Ka bynta jong ki dawai tika ban iada na ki jingpang ka dei kaba la sakhi naduh u snem 1796, ha kaba la ai dawai tika nyngkong pyrshah ia ka jingpang smallpox.
Ha kine ki 50 snem ba la dep, ki dawai tika ki la pyllait im ia kumba 15 klur ngut ki briew ha baroh kawei ka pyrthei kaba long 6 tylli ki jingim man ka minit man u snem.
Ka jingiadaia ki jingim ka dei ka thong kaba kongsan jong ka Universal Immunization Programme (UIP) jong ka India. Man u snem, palat 2.6 klur ki khyllung ba dang shukha ki ioh ia ki dawai tika hapoh ka UIP pyrshah ki jingpang kum ka measles, diphtheria, polio, bad kiwei kiwei kiba buh jingma ia ka jingim bad kiba lah ban ktah bha ia ka koit ka khiah bad ka bha ka miat jong ki khynnah.
Watla kane ka kam ka la sdang ha u snem 1985, ka la iarbha ha kine ki 10 snem ba la dep. Ki kam kum ka “Mission Indradhanush” ki la kyntiew ia ka jingai dawai tika sha palat 90%.
Ngi dang iakynduh ia ki jingeh ban pyndap 100% ka jingai dawai tika kiba long kum ka jingartatien ban ai dawai tika ha katto katne ki thain bad ki jaitbynriew, bad ka jingieh noh shiteng namar ka jingkynriah jaka sah bad ruh kiwei kiwei ki daw bad kane ka pynlong ba don ki khynnah kiba ym pat ioh lane ioh tang shiteng por ia ki dawai tika.
Hapoh ka jingialam jong u Myntri Rangbah Duh, Narendra Modi, ka Sorkar India ka la peit bniah ba ki longkmie bad ki khynnah ki ioh ia ka koit ka khiah bad ka bam ba tei bad ka ieng skhem ha ka kam ban ym ieh ia inoino i khynnah ne longkmie khlem da ioh ki dawai tika.
Ban pynurlongia kane, ka tnadka koit ka khiahka la wanrah ia ka lad teknikal ban pynbun ka jingai dawai tika lyngba ka U-WIN (Universal Immunization Programme-WIN). Ka U-WIN ka dei ka rynsan digital kaba kyntiew kyrteng bad peit ia ka jingioh dawai tika jong baroh ki longkmie ba dang pun khun bad ruh ki khynnah ha baroh kawei ka India.
Ka U-WIN, ka dei ka thup jong ki kyrteng kaba plie lad ia ka jingioh dawai tika ha kanokano ka por ha kanokano ka jaka. La saindur ia ka da kaba phaikhmat shuwa sha ki briew bad kane ka rynsan ka don ki bynta bapher bapher ban pynsuk ia ka jingkyntiew kyrteng.
Ki longkmie ba dang pun khun ki lah ban kyntiew kyrteng ialade lyngba ka rynsan ne app U-WIN lane ki lah ban leit sha kanokano ka jaka ai dawai tika ban kyntiew kyrteng ialade.
Shisien ba la dep kyntiew kyrteng, ki nongai jingsumar ki lah ban buddien ia ki dawai tika ba la ai, buddien ia ka jingkhakhun, kyntiew kyrteng ia ki khyllung ba dang shukha bad sdang ia ka jingai dawai tika ia kine ki khyllung. Ia kane lah ban buddien da ki nongpyniaid kam haduh ba ki khynnah ki dap 16 snem ka rta.
Ka U-WIN ka ai shibun ki jingmyntoi ia ki kmie ki kpa bad ki nongsumar, ha kaba ki lah ban ioh ia ki jingai dawai tika ha kanokano ka jaka hapoh ka ri bad ki lah ban ai jingiada ia ki khun jong ki da kaba suk. Kane ka rynsan ka don lad ruh ban buh por lypa ban ioh ia ki dawai tika kaba iarap bha ia ki nongbylla kiba nabar jylla.
Ka U-WIN ka don ha 11 jait ki ktien, bad kane ka kyntiew ia ka jingplie lad ia ki briew ba kin pyndonkam ia ka. Sa kawei ka bynta ka dei ka jingpynkylla digital ia ki jingtip. Man ka por ba ki briew ki ioh ia ka dawai tika, la buh jingtip lyngba ki lad digital.
Ki briew ki ioh ruh ia ka jingpynshisha lyngba ki lad digital bad ka syrnot kaba don u QR code, kiba ki lah ban download bad buh ha ka mobile jong ki ban pynshisha ha kanokano ka jaka – kaba iarap bha haba leit wad skul bad leit na kawei ka jaka sha kawei pat.
Shuh shuh, ka rynsan ka phah jingtip lyngba ki SMS bad ki jingpynkynmaw shaphang ki dawai tika ba dang hap ai, kaba pynthikna ba ki kmie ki kpa bad ki nongai jingsumar ki bud ia ka por kaba la buh hapdeng ki jingai tika.
Ka U-WIN ka long kum ka jingpyniasoh, kaba wanrah lang ia ki kmie ki kpa/ ki nongsumar, ki doktor, ki nongai jingsumar bad ki lad ai jingsumar ha kawei ka rynsan. Kane ka plie lad ia ka rukom buddien ia ka jingai dawai tika kaba iaidryntih ha kylleng ka ri.
Ka plie lad ruh ia ki briew ba kin shna ia ki ID Ayushman Bharat Health Account (ABHA)bad Child ABHA kiba iarap ban iasam jingtip shaphang ka koit ka khiah bad ki nongai jingsumar bad ki nongai jingshakri, hadien ba ki briew ki la ai jingmynjur ban leh ia kane. Kane ka plie lad ia ki nongai jingsumar ba kin ioh lut ki jingtip kiba ki donkam.
Ka U-WIN ka iarap ruh ia ki ANM bad ki ASHA ban shna ia ki thup jong kito kiba dei ban ioh ia ki dawai tika bad ka kyrshan ia ki kam ban pynthikna ba ki briew ki ioh ia ki dawai tika ha ka por ba dei.
Ha kine ki 10 snem ba la dep, ka India ka la shaniah ha ki rukom sumar ba la saindur ha ka ri ban pynkylla ia ka kam ai jingsumar. Ka electronic vaccine intelligence network (eVIN), kaba la wanrah ha u snem 2014 ka la pynkylla ia ka rukom ioh, rukom buh, bad rukom sam ia ki dawai tika.
Ha ka por jong ka khlam COVID-19, ka pyrthei ka la iohi ia ka jingjop jong ka Co-WIN, kaba long kum ka budlum da ka teknoloji jong ka kam ai dawai tika COVID-19 jong ka India kaba la iarap ha ka jingai 220 klur tylli ki dose dawai tika hapoh 18 bnai. Mynta, ka U-WIN ka don ha ka khep ban pynkylla ia ka kam ai dawai tika ha ka ri da kaba kyntiew ia ka jingai ia kine ki dawai.
Katba ka India ka dang jam sha ka jingdap shi spah snem kum ka ri kaba la laitluid, ka jingkut jingmut jong ka na ka bynta ki kam ai dawai tika kam dei tang ka kam na ka bynta ka koit ka khiah – ka dei ka jingbei tyngka ha ka nongrim na ka bynta ka lawei.
Da kaba niewkor ia ka jingai dawai tika ia ki nongshong shnong ba dang khynnah lyngba ki jingdon jingem digital bad ki kam paidbah kiba khlain na ka bynta ka koit ka khiah, ka India ka ialeh pyrshah ia ki jingpang ba lah ban kiar bad ka pynthikna ruh ba ki briew jong ka ri ki dei kiba koit ba khiah bad kiba skhem ha ka ioh ka kot.
Kine ki sienjam ki pyni ia ka jingkut jingmut ban tei ia ka lawei ha ka bym don inoino i khynnah bym ioh ia ki dawai tika ba pyllait im, la ki sah ha ki jaka lum jong ka Jammu & Kashmir, ki ri shyiap jong ka Kutch, ki jaka khappud jong ka Arunachal Pradesh, lane ki shnong ba kersawdong da ka um kum ki dewlynnong Andaman bad Nicobar.
