Shillong, Risaw 30: Ka tnad sambam sam dih ka jylla mynta ka sngi kala pynlong ia ka jingialang kaba shi sngi ban ia kren kumno ban dang pynkhlian ban peitngoir ia ka jingkiew dor ki marbam mardih, kane ka long kum shibynta ban ai jingpynshai halor ka jingkiew dor ki marbam mardih.
Ia katei ka jingialang la plie da u Myntri ka tnad sam bam sam dih u bah Comingone Ymbon, haba iakren bad ki lat pathai khubor ula pynpaw ia ka jingkongsan ban pynneh kumjuh ia ka dor ka mur.
“Ngi lah pynlong ia ka workshop ban pynkhlain ia ka price monitoring cell. Ngi lah iatai sani bha halor katei ka mat bad baroh ki Deputy Commissioner kiba la wan sha ka jingialang. Ngam kwah ba kan don ka jingkiew dor palat bad dei halor kane ba nga la phah pynlong ia kane ka workshop” ong u Bah Comingone.
Halor ka jingud ki paidbah ia ka jingkiew dor ki marbam mardih, u Myntri ula ong, “Mynta ka sngi ngi lah rai ban kyntu ia u Myntri Rangbah ka jylla ba un wanrah lang ia baroh ki tnad kiba donbynta kiba kynthup ia ka tnad Home, Agriculture bad Food & Civil Supplies na ka bynta ban iatai shuh shuh. Hynrei kane kan urlong hadien ba la dep ka elekshon shiteng samoi ha Gambegre.”
Ka tnad Food and Civil Supplies kala pynmih ia ka jingthoh kaba la batai bniah ia ki daw kiba la pynlong ia ka jingkiewdor ki marbam kiba kongsan kum u khaw, ki jhur ki jhep, ki dai, shana bad kiwei kiwei.
Katkum ka jingpynpaw jong ka tnad, ka jingbym slap thikna kala wanrah ia ka jingtyrkhong bad ha ki katto katne ki jingjia pat kala don ka jingshlei um kaba la pynduna ha ka jingpynmih ia ki marbam.
Ka tnad kala kdew ruh ba ka don ka jingbym biang ha kaba iadei bad ka jingdawa bad ka jinglah ban pyndap pynbiang bad kala don ruh ka jingrem ha ka dor jongka jingbylla bad ka jingkit jingbah, khamtam ha ki jaka lum jongka Meghalaya kaba la lam sha ka jingkiew dor na ka bynta ki nongthied.
Ka tnad kala kdew ruh ba ka jylla Meghalaya ka shaniah ia ki katto katne ki marbam kiba wan nabar bad ka dor ha ki shnong ki thaw kala shah ktah na ka jingkylla khah khah ka iew ka hat hapoh ka ri.
