Shillong, Naiwieng 12: Ka workshop kaba lai sngi halor ka phang “Impact Assessment bad Capacity Building Workshop for Akashvani’sKisanvani and Doordarshan’sKisan and KrishiDarshan programme producers from the East Zone and North East Region” ka la sdang mynta ka sngi lyngba ka jingialang pliepyrda ha Indian Council of Agricultural Research (ICAR) ha Umiam, Meghalaya.
Ka workshop kaba lai sngi naduh 12 haduh 14 tarik Naiwieng, ka thmu ban pynkhlain ia ki prokram ba iadei bad ki kam rep ban kyntiew ia ki lad kamaikajih ha ki jaka nongkyndong ha kylleng ka East Zone bad ka thain shateilammihngi.
Ia kane ka workshop la plie da u Dr. B. D. R Tiwari, IAS, Commissioner & Secretary sha u Lat ka jylla Meghalaya, bad Chief Electoral Officer. Kiwei kiwei ki kynrem ki lyndan ki kynthup ia u AshishBhatnagar, Additional Director General (A&BO) for the North East Zone of AIR and DD.
Dr.Venu Prasad H.D, Joint Director (MM) ha ka Tnad ka koit ka khiah, Sorkar India, u Vijendra S Sajwan, Assistant Director of programmes, (F&H/Policy) DG, Akashvani Delhi, Bah H. Diengdoh, Deputy Director bad Head of Office ha ka Akashvani Shillong, bad Kong Mary Marbaniang, Head of Department, AIR Shillong
Ha ka jingai jingkren, u Kongsan Dr. B.D.R Tiwari u la kren shaphang ka jingkongsan ka Akashvani bad Doordarshan kum ki tyllong ba kongsan jong ka jingai jingtip ba lah ban shaniah na ka bynta ki nongrep jong ka ri.
“Ka Akashvani ka iai long ka bor kaba kongsan, kaba la ktah ia ki mynsiem jong ngi da ki ktien jong ka.Wat hapdeng ka jingkiew ka teknoloji, ki channel kum ka Kisanvani ki long ka sur ba shisha jong ki nongrep,” u la ong.
U Tiwari u la kren shaphang ki channel kum ka Kisanvani bad KrishiDarshan kiba long napdeng ki prokram ba iadei bad ki kam rep kiba la slem tam ha ka pyrthei, kaba la kylla na ka por sha ka por katkum ki jingdonkam jong ki briew ha ki jaka nongkyndong.
U la ai jingiarohia ki sienjam jong ka AIR bad DD ban pynthikna ia ki khubor kiba bha, kiba don ka jingshisha kiba ai jingshakri ia ki briew jong ka ri. U la kyntu ban buh jingtip ia ki rukom rep hyndai bad kyntu ka jingpyniasohlang ia kita ki jingtip ha ki skhim jong ka sorkar.
Ka workshop kan kynthup ia ki phang bapher bapher, kum ki jingsaindur thymmai, ki rukom rep tynrai, bad ki rukom ban plié lad shuh shuh ia ki nongrep ba kin ioh ia ka jingnang jingstad katkum ka science.
“Ki nongrep jong ngi, khamtam ha ka thain shateilammihngi, ki don ka spah ba iadei bad ka rep ka riang bad ki rukom rep ki bym pat lum jingtip. Kane ka workshop kan peit ia ki rukom ba bha ban pynsaphriang ia kane ka jingtip, khnang ba kan poi sha man ki nongrep, bad ban lum bad iada ia kine ki rukom treikam kiba la neh,” u la pynkut.
U AshishBhatnagar, ADG NEZ, Akashvani&Doordarshan u la kren shaphang ka jingkongsan ka 12 tarik Naiwieng, ha kaba ka All India Radio ka rakhe ia ka Public Service Broadcasting Day ha ka ri kaba kynmaw burom ia ka jingwanjngoh u Mahatma Gandhi ia ka All India Radio (AIR) ha u snem 1947.
U Bhatnagar u la ong ba ka Public Service Broadcasting Day kalong kum ka jingialang ban ai jingiaroh ia ka bynta jong ka All India Radio bad Doordarshan, ki rynsan ai jingtip sha ki briew jong ka ri,ban ai jingtip, ai jinghikai bad pynbyrnia ia ki paidbah.
U Bhatnagar u la kren shaphang ka jingiar jong ka All India Radio u la ong ba ka AIR ha ka thain shateilammihngi jong ka ri ka pynsaphriang ia ki jingtip bad ki prokram ha 90 tylli ki ktien. Ka jingpoi ka AIR khamtam ha ki jaka nongkyndong jong ka ri, ka iahap bad ki jingngeit jong u Gandhi.
U Mahatma Gandhi u ngeit skhem ba ka mynsiem jong ka India ka don ha ki shnong jong ka. Ka thong jong u ia ka roi ka par ka kynthup ka jingpynkupbor ia ki briew ha ki jaka nongkyndong, bad ha kiba bun ki rukom, ka AIR ka la bteng ban pynkhie im ia kane ka thong da kaba weng ia ki jingeh ba iadei bad ki briew ha ki jaka nongkyndong, u la bynrap.
U la kyntu ia baroh ki nongiashim bynta ha kane ka prokram, kiba wan na kylleng ka thain shateilammihngi bad ka thain mihngi jong ka ri, ban pynneh ia ka jingphaikhmat jong ki ha ka jingai jingtip kaba shai ka bym iashah liang, ka jingiatylli ka ri, bad ka bha ka miat jong ka imlang sahlang.
U la ong ruh ba kadei ka sngi ban pyndon burom ia ka jingkut jingmut jong ki channel ai jingtip ban shakri ia ki paidbah, khamtam kiba sah ha ki jaka nongkyndong kiba shaniah ha kine ki jingshakri na ka bynta ka jingioh jingtip, ka pule puthi.
Ka jingpynbyrnia bad u la bynrap ba ki prokram ba iadei bad ki rukom rep, ki jingai jingmut ba iadei bad ka koit ka khiah, ki sienjam ba iadei bad ka pule puthi, bad ki jingtip shaphang ka jinglong ka suinbneng ki la long kiba la iarap bha ia kimillion ngut ha kylleng ka ri, khamtam kito kiba sah ha ki jaka ba jngai.
Ka AIR bad ka Doordarshan ki la trei borbahna ka bynta ka bha ka miat jong ki paid nongrep naduh u snem 1967. Ka AIR ka pynmih ia ka prokram kaba kyrpang na ka bynta ki nongrep ha ka ktien tynrai jong ki naduh u snem 2004 ha ka jingiatreilang bad ka Tnad ka rep ka riang bad ka bha ka miat jong ki nongrep, Sorkar India.
Ka Doordarshan ka la sdang ia ka channel kyrpang na ka bynta ki nongrep ha u snem 2015 ha ka sienjam jong u Myntri Rangbah duh, Narendra Modi. La pynlong ia kum kine ki workshop na ka bynta ki nongpynmih prokram jong ka AIR bad ka DD na ka por sha ka por.
