Shillong, Naiwieng 28: u bah Prestone Tynsong symbut myntri rangbah ka jylla, ba ka jingiadon lang ka myntri ka koit ka khiah ka jylla ka kong Ampareen Lyngdoh la buh ia u mawnongrim ban shna ia ka Sub-Division Hospital ha Pynursla.
Kane ka long ban kyntiew kyrdan ia ka Pynursla CHC sha ka Sub-Divisional Hospital bad ha kane ka sngi la plie ruh ia ka jaka ban ai jingbit ban phah sumar ha ka Pynursla CHC kane ka long ka jaka kaba nyngkong ha East Khasi Hills District.
Ha ka jingkren jong u bah Prestone Tynsong la ong ba kane ka long ba ka sorkar ka don ka jingkut jingmut ban kham pynbiang ia ki lat jingai jingsumar sha kylleng ki bynta jong ka jylla, kane ka dei kawei ban kyntiew kyrdan ia ka Pynursla CHC sha ka Sub-Divisional Hospital.
Kane ka long ban kham pynbha ia ki lat jingsumar ha katei ka thian bad ka sorkar kala mang bun ka pisa ha ka liang ka koit ka khiah bad la kyntu ia ki paidbah ban ia treilang ban wanrah ia ki lat jingsumar ha ka koit ka khiah.
U bah Prestone u la ban jur ba ka long kaba don kam ban ioh ia ka koit ka khiah, ha juh ka por u la ban jur ba ki paidbah kin pyniasoh iaka MHIS bad ka Aadhaar ba ki paidbah kin ioh ia ka jingiarap ha ka por ba don kam ia ki jingiarap bad la ong ban kiar na ki jingngeit biej.
Ha ka jingkren ka myntak ka koit ka khiah ka kong Ampareen Lyngdoh kala ong ba da ka jingplie ia kane ka jaka ban long kum ka jingbthah kan iarap ia ki paidbah namar ka jaka sumar kan plie 24 kynta ban sumar ia ki babun ki jingpang jingshitom ha kaba kala jer kyrteng kato katne ki jingpang.
Ka myntri kala ong ba ka jaka buh snam ha kane ka jaka ai jingsumar kan sa treikamnoh shen,ka sorkar ka don ia ka thang ban iada na ka jingkhlad jongki long kmie ha ka por ba kha khyllung,ka kyntu ia ki VHC bad ia ki ASHA ba kin pynshlur ia ki long kmie ban pyndon kam ia ki jaka ai jingsumar ban shngain ha kaba kha khun.
Ha kane ka sngi ka myntri ka la ong ba ka sorkar ka kwah ban ai ka jingsumar kaba biang ia baroh bad la kyntu ia ki paidbah ba kin pyndon kam ia ki jaka sumar,ha kane ka sngi la don lang ruh Sampath Kumar, Principal Secretary, Health & Family Welfare, ka sorkar Meghalaya, Dr. J.S Momin, Director ka Health Services (MI), ka kong E.L Warjri, SDO, Pynursla Civil Sub-Division, bah A. Lyngdoh, Rangbah Shnong, Urksew Wahpathaw, Pynursla bad bun kiwei kiwei de.
