Shillong, Nohprah 07: Mynta ka sngi ka seng samla pule ka Khasi Student Union (KSU) mynta ka sngi kala pynlong ia ka jingbuh syntiew ha ka dur mot jong u bah Bull Lyngdoh President ba saw jong ka seng ha Malki ha ka lyngkhu sngi iap kaba 30 snem.
Ha ka jignkren u President ka seng u samla Lambostarwell Marngar ha kane ka lyngkhuh sngi iap kaba 30, u la pynkynmaw ia ki kam kiba kraw kiba u nongialam u la leh ha ka por ba u don ja ka seng haduh ba un da ioh ban ialam ia ka seng kum u president.
U Bull N Lyngdoh uba ki paidbah ki tip kum u Bull u dei u President ba saw jong ka KSU. U la shimti ia ka kam President ha u snem 1983 tad haduh u snem 1990. U la bat ruh kum u Secretary General ka North East Students’ Union (NERSU) hapdeng kine ki snem.
U Bah Bull u pawkhmat bha halor ka jingiakhih pyrshah ia ki mynder ha u snem 1987 kaba la tip ruh kum ka 2nd Anti-foreigners Movement hadien ka jingiakhih kaba la long ha u snem 1979 ba la lam khmat da u Bah Michael Syiem. U Bah Bull ha ki por u bah Mike u bat kum u disciplinary Secretary ka seng.
Kum u President ka seng u la pynpaw ia ka jinglong ba kat u nongialam, ha ki jingialeh khlem riej u la ialam ban ialeh ban iada ia ka jaidbynriew ha kiba bun ki liang kaba ym lah shuh ban niewtang ia ki kam kiba u la leh.
Kum u nongialam u la mat ia ki jingshah kem shah set phatok bad ka jingshah tied ha ki nor jong ka ain haduh ba kala ktah ia bor met jong u tei u nongialam hynrei khlem pyndem ha ka jingialeh.
U bah Bull u la ia khun ilekshon ha u 1990 na Malki-Nongthymmai Constituency bad u la jop, hynrei hadien um treh ieng ilekshon shuh namar u la ingiah ia ka jyrsieh politics.
Namar ka jingshah tied shah pynshitom ha ki bor pulit, u bah Bull um lah kyrda shuh na ki jingpang bad u la khlad noh na ka pyrthei ha ka 7 tarik u Nohprah 1994 ha ka rta ba dang lung, kata 42 snem.
