Shillong, Nohprah 17: U Myntri rangbah ka jylla u Conrad K Sangma ha ka jingiadon lang u symbut myntri rangbah ka jylla u bah Prestone Tynsong la pynlait paidbah ia ki bun tylli ki kot kiba la thoh da ki riew wat bniah kiba la bei pisa da ka KHADC.
Ia ki kot la pynlait paidbah ha ka jingialang kaba la pynlong ha State Convention Centre, ha ka jingdon lang u Chief Executive Member ka KHADC u bah Pyniaid Sing Syiem, ki Executive Member, ki MDC bad ki ophisar na ka KHADC.
Haba kren ha kane ka jingialang u myntri rangbah ka jylla u la ong ba la bei pisa sha ka KHADC na ka Chief Minister Grant ban kyntiew ia ki kam wat bniah haba ia ei bad ka riti dustur bad kiwei kiwei ki jinglong tynrai, ha kaba la ai T.50 lak ban leh ia kane ka kam wat bniah.
U Myntri Rangbah ka jylla mynta ka sngi la pynlait paidbah ia ki kot kiba la thoh ia ka jinglong tynrai, ka riti ka dustur bad kiwei kiwei ia kiba la thoh da ki riew wat bniah kiba la jied na pdeng ki riew shemphang bad kiba tip bha ia ka jinglpng tynrai u khun khasi khara.
U myntri rangbah u la ong ba ia ki jingstad tynrai bad ia kaei kaba ki briew ki bud dei ban pynneh pynsah bad ban dang pynbha shuh shuh, namar ka jingstad dei ban pyndon kam kumno ban weng ia ki jingeh kiba ka pyrthei ka ia shem jngeh.
Ia ka jingriewpsah ka riti dustur dei ban dang pynbha bad ri sumar ia ki, ia ka jingstad kaba la ioh pateng na u longshuwa man shuwa dei ban pyndon kam ban weng ia ki jingeh khamtam ha kaba ia dei bad ka mariang bad kumno ban pynneh pynsah ia ka.
Ha kane ka sngi lapynlait ruh ia ka kot kumno ban pynneh pynsah ia ka mariang, ki dawai kynbat, bad ka jingai jingsumar bad ban kyntiew ia ki kam jngohkai pyrthei bad ka shim jaid na ka kmie, ka shongkha shongman khasi bad bun kiwei kiwei.
U myntri rangbah ka jylla u la ai ka jingiaroh ia kane ka jingwat bniah, la ong ba ia kine ki kot dei ban ai sha ki Kolej bad ki skul bad la ong ban ia kren bad u myntri ba dei peit ia ka pule puthi ban buh ia kine ki kot haka tribal society ha ki ksul bah ka ri India bakin sngewthuh sha phang ki rielwum.
