Shillong, Nohprah 20: Ka Khasi Students’ Union lyngba ka Employment Monitoring Cell ka la pynher shithi sha u Bah D.P Wahlang, IAS, Chief Secretary jong ka jylla Meghalaya halor ka jingbymshaniah ia ka result jong ka mains jong ka MCS bad ka jingpynslem bad ka jingkynrum ha ka post typist.
Ka Seng ha kine ki khyndiat bnai ba ladep ka la iakhih ban pynbor ia ka MPSC ba kan pynmih ia ki marks jong ka Prelims jong ka MCS bad halor kiwei kiwei ki mat. Hadien ba ka MPSC ka la pyndem tdong bad pynlait ia ki marks la iohi shibun tylli ki jingbakla.
Ka Seng ka lah phah ruh ia ki 20 tylli ki mat jingdawa sha ka Sorkar ban pynthymmai ia ka rukom treikam ha ka MPSC bad na ka liang ka Sorkar ka shna ia ka Committee ka ban lamkhmat da u Bah F. R. Kharkongor Kharkongor bad kiwei bad kane ka Committee kan shong ban bishar bad ban pynbeit ia ka rukom treikam bad kan ai ia ka report ka jong ka ha ne shuwa ka 30 tarik u Kyllalyngkot, 2025.
Hynrei katba ka Committee ka dang shongpyrkhat, ka MPSC ruh ka pyndep wut wut ia ki eksam da kaba leh bor ban pynkhiud bad tap eit miaw ia ka jingbamsap ka jong ka. Ia kane lah ban pynshisha da ka result MCS.
Ka MPSC ka la pynmih ia ka resot jong kiba ialeh ia ka mains jong ka MCS ha 6 tarik u Nohprah, 2024. Ha kane ka resot la iohi ba 9 ngut na kita ki additional list ki la pass ia ka eksam.
Ki candidates ba ialeh ia kane ka eksam ki pynsngew ba ka long kaba sngewphylla ba tang hapoh katto katne bnai ba ki ioh por ban pynkhreh ia ka eksamin, kine ki lah ban pass ia kane ka eksam hynrei kito 580 ngut pat ki bun kiba kham pass bad ka jingbym pynlait ia ki marks ka pynartatien ia ki nongthoh eksamin ba ka lah ban don ei² sha lyndet.
Ka Seng ka la ioh shibun tylli ki jingujor halor kane ka bynta. Ki candidates ki lah batai sha ka Seng ba haba ki leit shapoh ka MPSC ban tip ia ka marks ka jong ki bad ban pan ia ka cutoff marks, kim shim la lah ban ioh satia ia kata.
Don napdeng jong ki ba lah file ia ka RTI ruh, hynrei ka MPSC kam shim ia ka application ka jong ki bad don kiba shah byrngem ruh ba ki thoh RTI. Don na ki candidates kiba pyneh ia ka MPSC halor ka jingbymshim ia ka RTI bad kum ia kita ka pdiang hynrei ka phah ia ki ba kim ym bit ban buh ia ka jingkylli kaba kam lah ban jubab bad ka ong ruh sha ki ba kan jubab ia ka RTI ynda ladep ka personal interview.
Kine ki jingleh na ka liang ka MPSC ka pynshan khmat ia ka Seng ba kadon kaei kaei sha lyndet ba ka MPSC ka ialeh ban buhrieh. Shuh shuh balei ba la salia ban pynmih ia ki marks.
Ka MPSC kam lah ban rieh halor ka daw ba da kaba pynmih ia ki marks kan ktah ia ka personal interview namar kane ka eksam kam dei shuh tang na bynta kito ki candidates kiba ialeh hynrei ia baroh ki samla wad kam ban don ia ka jingshaniah ba ka thungkam thungjam ka long kaba khuid. Kumta ka Seng ka dawa ba dei ban pynlait paidbah ia ki marks bad ia ka cutoff bad ki samla ki dei ban ioh peit ia ka answer script ka jong ki.
Shuh shuh halor ka post Typist (HOD) ba ladon bun tylli ki snem ba ka MPSC kam shim la lah ban pynmih ia ka result ka long kaei kaei kaba pynpaw ia ka jingbamsap napoh napoh ban thep ia ki briew ki jong ki ne ki briew jong ki heh ki haiñ.
Ka MPSC ka pynkylla ruh wat ia ki aiñ ba ladon lypa halor kumno ban thep ia ka kam. Kumta ka Seng ka dawa ba ka recruitment process na bynta ki Typist ka dei ban iaid beit thik katkum ka Meghalaya Directorate Establishment (Ministerial) Service Rules, 2010.
Ka Seng ka kyntu ia u Chief Secretary ba un shimkhia halor kane ka bynta ban pynbeit ia kine ki jingkynrum kynram jong ka MPSC bad kam shim kwah ban ia kren bad ka MPSC ha kaba la kynnoh ba ka long kaba bamsap bad katba pat lah ban pynthymmai ia ka rukom treikam jong ka, ka nym myntoi ia ka Seng ban iakren halor kano kano ka mat namar ka nym seisoh. Hynrei lada ka MPSC kam pynbeit ia kine ki jingujor haneng, ka Seng kan shim ia ka sienjam kaba kham tyngeh.
