Ampati, Rymphang 25: U Sanjay A Sangma MLA, mynta ka sngi la plie ia ka jaka ai jingsumar ha ka shnong Boldamgre kaba hap ha khappud bad ka Bangladesh ka South West Garo Hills District, ia kane ka jaka sumar la tip kum ka “Urban Health and Wellness Centre” bad kane ka dei kaba nyngkong.
Ha kane ka sngi ba plie ia kane ka jaka ai jingsumar jong ka sorkar la don lang u Digonto Hajong BDO jong ka Zikzak C&RD Block, la don lang u DMHO u Dr. H Barman, Nokma jong ka Boldamgre bad ki dkhot jong ka shnong ryngkat ki nongtrei ka tnad ka koit ka khiah.
Haba kren ha kane ka sngi la ong ba ka jingthmu jong kane ka jaka ai jingsumar ka long ban pynthikna ba ki paidbah kin ioh ia ki jingsumar wat sha ki jaka ba long kyndong tam ruh namar ka sorkar kala kut jingmut ban pynpoi ia ki jingai jingusmar sha ki paidbah sha baroh ki jaka.
Ha kane ka sngi u MLA u la plie paidbah ruh ia ka jingpyrshang ka tnad ka koit ka khiah jong ka District ban hikai ia ki paidbah “ Ear Right, Eat Healthy” kane ka long ban hikai ia ki briew ban bam ia ki jingbam kiba trei met.
Na ka liang jong u MLA u la ai ka jingiaroh ia ki nongtrei jong ka tnad ka koit ka khiah kiba la trei shitom da ka jingkut jingmut ha kaba sumar ia ki paidbah, u la ai khublei ba la ioh ia kane ka lat ban plie ia kane ka jaka ai jingsumar ha ka jaka bala kha ia u. La ong mynshuwa ki hap ban leit sha Mankachar ban phah sumar.
Ha ka jingkren u Dr. H Marman la ong ba ha kane ka jaka ai jingsumar kin ai ki lad jingsumar kiba bun jaid, na ka liang jong Nokma la ai ka jingkhublei bala lah ban plie ia kane ka jaka ai jingsumar ha kane ka jaka, Dr. Noreen Sangma la ban jur ba kumno ban kham pynkhlain ia ki lat jingsumar.
Ha kane ka sngi na ka liang jong u MLA ruh la pynlait paidbah ia ki lai tylli ki kali Ambulance ban ai ka jingshakri ia ki paidbah ha kane ka thian bad kine ki kali kin ai ka jingshakri ia ki briew ka thain ha kaba ia die bad ka pang ka shitom.
