Plie ka kong Roshan ia ka ATM ba nyngkong jong ka bank MCAB

Shillong, Nohprah 19: Ka Meghalaya Co-operative Apex Bank Limited mynta ka sngi ka la jam sa u wei pat u mawjam sha ka jingshakri ia ki paidbah kane ka jylla Meghalaya ha kaba mynta ka sngi kala lah ban plie ia ka jaka sei pisa lyngba ka ki kor kiba la tip kum ka ATM.

Ia ka ATM kaba nyngkong jong kane ka bank la plie da ka myntri kampoh iing jong ka jylla Meghalaya ka kong Roshan Warjri mynta ka sngi. Ha ka jingkren jong ka kum ka kongsan ha kane ka sngi ka la ai ka jingkular ba na ka liang jong ka sorkar kan ai jingkyrshan kaba pura ia kane ka Bank.

Ha ka juh ka por na ka liang jong ka myntri ka la ong ba ka kwah ban iohi ba kane ka bank ka dei ban plie ia kine ki ATM sha ki nongkyndong ruh kum juh ban ai ka jingshakri ia ki paidbah ha ka rukom kaba kham suk. Ha ka juh ka por ka la ong ba shen kane ka bank kan sa ioh ia ka kyrdan kum ka schedule bank.

Ha ka jingkren jong u M T Wankhede general manager jong ka NABARD, u la ong ban a ka liang jong ka NABARD ka kloi ban ai ka jingiarap ia kane ka bank bad ha ka juh ka por u la ong ba kane ka bank ka dei ban ialeh katba lah ban iarap ia ki nongrep ha kane ka jylla kiba don sha ki nongkyndong.

Kiwei kiba la kren ha kane ka jingialang ki long u Dr BDR Tiwari ba dei jong ka Cooperative jong ka sorkar Meghalaya, u Sachin Nerukar CEO jong ka Sarvatra Technologies (P) Ltd. Ha kane ka sngi la kren ruh na ka liang jong u heh ka RBI ba don ha Shillong. Ha kane ka sngi la don bun ruh kiwei ki heh jong kane ka Bank, u Bah DF War MD jong ka Bank u Bah WK Kyndiah Chairman jong kane ka Bank bad ki paidbah kiba la wan ban ia sakhi lang ia kane ka sngi sah kynmaw ha ka jingtrei kam jong ka MCAB.(SP News)