Shillong, Kyllalyngkot 10: Ha ka jingialang ba la khot da ka Meghalaya State Planning Board ban ia kren halor ki Central Scheme na ka Sorkar Kmie, kum ka MGNREGS, IAY, bad kiwei kiwei jong ka Sorkar, ka tnad Meghalaya State Planning Board, ka la pynlong ia ka jingiakren markhmat ‘open session’ bad ki Sordar, Rangbah Shnong, ki Secretary Shnong, ki Nongkitkam VEC kum ki Chairman, Secretary, bad ki Women’s representatives jong 103 Village Employment Councils (VEC) ha Mawthadraishan C&RD Block, ha ka 9 tarik January 2014 bad la ia kynduh ia ki 157 VEC ha Mairang C&RD Block, ha ka 10 tarik 2014, kiba don hapoh u pud u sam jong ka West Khasi Hills District, ban sngap ia ki jingai jingmut ki jingsngew jong ki halor ka jingtreikam jong ki bad khamtam ki jingeh ki jingmyntoi kiba la mih na ka scheme Mahatma Gandhi NREGS /NREGA ka scheme IAY bad kiwei kiwei.
Ha kitei ki jingialang baroh ar Mawthadraishan bad Mairang C&RD Block ki pynpaw ia ka jingkmen bad baroh ki mynjur ba ka scheme MGNREGS bad ki Scheme IAY (iing baduk) kiba dei ki Scheme jong ka Sorkar Kmie (Central Scheme) ki la long ka jingkyrkhu bad ki la pynkylla dur ia ki Shnong ki thaw bad la kyntiew ia ka rukom im jong ki paidbah kiba don hapoh u pud u sam jong ka Mawthadraishan C&RD bad Mairang C&RD Block.
Katei ka jingialang la plie da u Dr R Shadp Manner, AH&VO, Mawthadraishan C&RD Block, bad i Kong B Kharsyntiew, Agricultural Development Officer, ha Mairang C&RD Block, bad la pyniaid ia kitei ki jingialang da u Bah. John F Kharshiing, Co-Chairman, MSPB, & Chairman, Grand Council of Chiefs of Meghalaya, ha ka jing donlang i Dr(Mrs) Eureka Lyngdoh Mawlong, Dy Chairman, MSPB, bad ha ka jingdonlang ki Gram Sevaks bad kiwei kiwei ki officer jong ka C&RD Block.
Shwa ban sdang ka jingialang u Co-Chairman bad i Deputy Chairperson, ki la ia kynduh bad ia kren bad ki Gram Sevak, ban sngap bad sngewthuh ia ki jingeh kaba ki shem ha ki jingtrei jong ki bad ki la kyrpad ia ka State Planning Board ban thaw lad ban buh la ka jong ka Cadre khnang ban plie lad ia ki ha ka promotion namar kim don lad ban kiew kyrdan ha ka kam kaba ki trei. Ki la pynpaw ia ka jingeh ha kaba iadei bad ka leit ka wan namar ka jingjngai ki jaka ha kaba ki don ki Shnong ha kaba ki hap iaid kjat kumba lai kynta.
U Bah John F Kharshiing, Co-Chairman, u la ai khublei ia ki officer jong ki C&RD Block, bad u la kular ban rah ia ki jingeh jong ki Gram Sevaks ha khmat ka Sorkar Jylla kum shibynta ban pynjanai ia ka rukom trei kam jong ki. ha ka roi ka par.
Ha ka jingiakren ha khmat ki paidbah, ha kaba la khot ia ki nongkitkam jong ki 103 tylli ki VEC Mawthadraishan C&RD Block bad ia ki 157 VEC ha Mairang C&RD Block, West Khasi Hills, la ai lad ia ki ban kren mar 2 miniute ban pynpaw ia ka jingsngew ka jingaijingmut jong ki kumno ban nang pynjanai ia ki scheme bapher bapher jong ka Sorkar khamtam ka scheme MGNREGS.
ki riewkhmat, ki Sordar ki Nongkitkam ki Longkmie, jong ki VECs na ki kyndong ba pher bapher jong ka thain Mawthadraishan bad Mairang, ki la pynpaw ia ka jingkmen bad la ai khublei ia ka Sorkar India namar kane ka Scheme MGNREGS naduh ba ka la sdang sha kine ki thain 2008 – 2013.
Ha kane ka jingiakynduh kaba markhmat, ki jingai jingmut bad ki jingeh kiba mih ki long ba la donkam ban pynbeit thymmai ia u pud u sam jong ki C&RD Block, namar ka Mawthadraishan C&RD Block, ka don 469.9 Square Km katba ka Mariang C&RD Block, ka don ar shah ka jingeh kata 831 Square Km.
Kiba bun ki la kyrpad ia La ioh lum ba ki bun ki Shnong kim pat poi lane ioh surok rong, ki don bun ki Shnong ki bym pat poi surok hapoh Mawthadraishan C&RD Block, haduh san tylli ki Shnong hapoh ka Mairang C&RD Block ki bym don surok, kiba bun kim don umbam umdih (potable drinking water), bad ar tylli ki Shnong hapoh Mairang C&RD Block kim don bording (Electric).
Ka jing bym don ki bank ha kiba bun ki Shnong, ka wanrah ia kiba la Rangbah ban iaid iaid kjat lai saw kynta ban poi sha ka bank sha Mairang
Baroh ki VEC ha Mawthadraishan bad Mairang C&RD Block ki long shisur ba donkam ban pynkiew ia ka bai bylla kaba tyngka (Rs) 145 ba kan ia hap dor bad ka bai bylla jong ka por mynta.
Ki VEC ki la kyrpad ia ka State Planning Board ban kyntu tyrwa sha ka Sorkar ba kan shah ia ki VEC ban shna ki surok rong, bad ban lah ban shna pynbha ia kiba la duh (repair – maintenance). Ki ba bun ki VEC ki la ud ia ka rukom pyllait pisa ha kaba ka la long kaba slem bad kaba la ktah ia ki ba bat ia ki job card.
U Bah John F Kharshiing, Co-Chairman, u la kyntu ia ki Shnong ban pynkhreh ia ka ‘Map’ jong ka Shnong, ka khana samari jong kawei pa kawei ka Shnong, u la kyrpad ia ki Dorbar Shnong kiba don ki Law Shnong ban phah jingtip sha u BDO bad sha ka office jong u khnang ban ioh ban ia kynduh kyrpang ia kitei ki Shnong kiba don ki khlaw Shnong.
Kiba bun ki la pynpaw aiu kan jia lada ki Sordar ki Rangbah Shnong, ki Dorbar Shnong, ki VEC ki rai ban nym ia trei lang shuh bad ka Sorkar ha kaba iadei bad baroh ki scheme, ki la pynpaw ba ki Chairman, ki Secretary, ki nongkitkam Shnong ki la shuh ia trei mon sngewbha bad iarap ban pyntyllun ia ki scheme, MGNREGS, IAY, PHE, ICDS, Census, MPLADS, MLA scheme, bad kiwei kiwei ki scheme jong ka Sorkar. Kumta ki Nongkitkam Shnong ki la kyrpad ia ka State Planning Board bad pynsngew sha ka Sorkar ban thaw ka Ain ban ithuh ia ki Dorbar Shnong bad ban mang kyrpang ia ka bai lut sngi na ka bynta ki nongpyniaid Shnong kum shi bynta ban pynjanai ia ki scheme treikam jong ka Sorkar Jylla, namar kumba long mynta ki nongkitkam Shnong ki la shuh trei mon sngewbha (voluntarily).
Na ka liang u Bah John F Kharshiing, Co-Chairman, Meghalaya State Planning Board, Working Group -3, bad Chairman, Ka Dorbar Ki Khlieh Nongsynshar, u la ong ba kin sa rah ia kine ki jingai jingmut jong baroh ki Sordar, ki Rangbah Shnong, ki Chairman, Secretary, Treasurer, jong ki Village Employment Council (VEC) bad Area Employment Council(AEC) ban u la kyrpad ia ki ban phah lada don kino kino ia ki jingai jingmut kumno ban pynjanai bad nang kyntiew ia ki rukom treikam jong ki scheme C&RD, da ka jingthoh lyngba ki BDO jong ki lane ban phah beit sha u Bah John F Kharshiing, Co-Chairman, (mobile 9436102663 – office-9856022735), ha ne shwa ban kut u bnai February 2014, kum shibynta ban iarap ia ka State Planning Board ban ioh ai ban pynkhreh ia ka report kaba biang sha ka Sorkar Jylla Meghalaya.
Kiwei kiba la ia kren ha katei ka jingialang ki long i Dr(Mrs) Eureka Lyngdoh Mawlong, Dy Chairman, MSPB kynthup ki offisar jong baroh ar tylli kata ka Mawthadraishan C&RD Block bad Mairang, C&RD Block.(SP News)
