Tura, Kyllalyngkot 23: Ka skul jong ka sorkar pdeng ka Jawahar Navodaya Vidyalaya (JNV), kaba don ha Mahendraganj ha South West Garo Hills, kala long ka skul kaba nyngkong na pdeng ki skul JNV ha kane ka jylla Meghalaya ban ioh ia ka smart Class ia kaba la ai jingiarap da ka Samsung Company.
Na ka liang jong ka company ha dien ba kala iohi ia ka jingpass bha jong ki khynnah pule na kane ka skul jong ka sorkar pdeng kala shim ia kane ka skul da kaba ai sngewbha 41 tylli ki laptop na ka bynta ban ia jinghikai ia ki samla pule ha kane ka skul ba kin lah ban ia beh katkum kane ka juk kaba mynta.
U Deputy Commissioner jong kane ka District u Ram Singh bad u heh pulit u R. Muthu kila pynpaw ia ka jingsngew kmen ka jong ki ban iohi ba kane ka skul ka ioh ia kineki lad jingiarap kaba long ka jingkyrkhu ia ki samla pule ha kane ka juk kaba mynta.
U Deputy Commissioner u ba dei u Chairman jong kane ka skul u la ong ba ha kane ka juk kaba mynta bun na ki skul ki don kam ia kane ka jinghikai hynrei bun kim ioh ia kane ka lad, u la kyntu ia ki samla pule ha kane ka skul ba kin pyndon bha ia kane ka lad kaba ki iohi.
Ha ka jingkren jong u Principal kane ka skul Vidyalaya, u M. Sreenivasa Rao u la pynsngew sha ki kmie ki kpa bad kiba la wan ha kane ka sngi ba ka jingthmu jong kane ka long ban wanrah ka jingkylla ha ka jingpule bad ha ka pyrkhat pyrdain ha ki samla pule.(SP News)
