Shillong, Iaiong 22: Mynta ka sngi ka 22/Iaiong/2026 ka party VPP kala pynlong ia ka jingialang paidbah ha Motpran ban pynshai paidbah halor ki phra tylli ki mat kiba ka party ka dawa na ka sorkar ba ka dei ban pyntrei kam ia ki jingdawa.
Haba kren ha kane ka jingialang paidbah u president jong ka party u bah Ardent Miller Basaiawmoit u la pynshai paidbah ba ki dawa ba dei ban pynduh noh syndon ia ka skhim ha Lumpongdeng, kino kino ki skhim ba wanrah ki dei ban ioh ka jingmynjur na ki paidbah.
Ha kane ka jingialang ka sorkar ka dei ban pynsangeh noh ia ka jingpynshitom ia ki nonghikai, ba ka sorkar ka dei ban weng ia ki jingbthah ba ki nonghikai kiba la dep hikai slem ba ki dei ban thoh ia ka exam MTET namar kane ka pynduh mynsiem ia ki nonghikai kiba hikai slem ha kajuh ka por ki dawa ba dei ban weng noh ia ka Meghalaya Private College Act 2025 kaba ktah ia ka bor jong ki jaka ai jinghikai.
Ka dawa ba dei ban pyntikna ba ka jingthung kam lyngba ki DSC bad MPSC ka dei ban long kaba khuid kaba suba dei ban weng ia baroh ki dkhot kiba don ka jingiadei bad ka sain pyrthei dei ban pynduh ia ka jingleh shilliang, ka jingbam sap bad ka jingklop pisa tyngka, dei ban sangeh noh ka thung kam ia kiba la shong thait.
La dawa ba dei ban iada ia ki jaka paidbah dei ban sangeh ia ki jingdie na lyndet bad ka jingthied beain ia ki jaka puta ba dei ban bud ia ki kyndon bat khyndew khlem da iaid lait na ki bor jong ka District Council dei ban iada na ka jingwan ki mynder ri sha ka jylla.
Ka sorkar ka dei ban pynsangeh syndon ia ki jaka thang dewiong bad ki karkhana dewbilat kiba thymmai bad ia kiba shna beain dei ban khang noh shi syndon ban iada ia ka mariang bad ka koit ka khiah jong ki paidbah ka sorkar ka dei ban wad ia ki mynder ri kiba don ha Meghalaya bad phah biang ia ki sha ki jaka kaba ki wan.
