Shillong, Jymmang 10: Ka seng samla pule ka Jaintia Student Union (JSU) kala ai da ka jignthoh sha u myntri ka tnad pule u bah Lahkmen Rymbui ha ka jingiakynduh ha Jowai Polytechnic ha kaba kila kdew ia shibun ki jongdon kam ha ka pule puthi ha Jaintia Hills District.
Ha kane ka jingiakynduh bad u myntri ka tnad pule ki nongialam ka JSU hapoh ka jingialam jong u sectrtary ba peit ia ka pule puthi u samla Khynroo Bocheru Mi Pohsnem kila iakren ia shibun ki jingdon kam ha ka pule puthi hapoh ka District naka bynta ka jingdon kam ki samla pule kiba duna ka ioh ka kot.
Ha kane ka jingiakynduh na ka liang ka JSU kala dawa ba dei ban pynbeit ryntih ia ka bai skul ban pynthikna ba baroh kin ioh ka lat ban leit pule khamtam kito kiba wan na ki long iing kiba duna ka ioh ka kot.
Ka JSU kala dawa ba dei ban pynheh shuh shuh ia ka jingplie lad ha kaba pule ha ka por janmiet khang ba kito kiba ym ioh rung klass kin ioh da kaba pyndonkam ia ki iing ki sem kiba la dep don, kane ka jingpule kan long ruh ha kiwei kiwei ki jaka pule jong ka sorkar ba ki samla kin ioh ban pule.
Ha kane ka jingiakynduh la kyntu ia ka sorkar ba kan thung nonghikai noh haka subject Biology Government Girls’ Higher Secondary School, Jowai bad ban thung ruh ha baroh ki kam kiba lait ha ki kam hikai.
Haba ia dei bad ka Hostel jong ki kynthei ha Mynthong ka JSU kala ong ba ka sorkar ka dei ban pynpra noh ia ka namar kam long shngian shuh ban sah briew bad dei ban shna thymmai noh da kawei khnang ba ki samla pule kin lait na ka jingshong wai ha ki iing kiba rem.
Katkum ka NEP-2020,ka sorkar ka dei ban pynbiang ia ki jingdon kam ki jaka pule kum ki jinghikai kiba katkum kane ka polisi kaba thymmai bad ha ka juh ka por ban kyntiew ia ki samla ba kin ioh ia ka bor pyrkhat kaba shait bakhlain bad ka pynshlur ia ki samla ba kin leit pule ha ki jaka ai jinghikai por jan miet.
