Shillong,Jymmang 20: Mynta ka sngi ka seng Jaintia National Council bad ka Jaintia Student Union kila leit tur bad thom ia ka ophis jong u Deputy Commissioner ka East Jaintia Hills District kaba don ha Khliehriat ban dawa ban pynsangeh mardor ia ka jingpynsngap paidbah ia ka M/s Shree Cement Private Limited ka ban long ha ka sngi Thohdieng ka 22/Jymmang/2026.
Ha kane ka jingleit sha ophis jong u Deputy Commissioner nalor ki dkhot jong kitei ki ar tylli ki seng la don lang ruh ki longkmie,longkpa ki samla jong ka shnong Daistong ban pynpaw ia ka jingpyrshah ban pynlong ia ka jingpynsngew paidbah ia ka jingkwah ka Shree Cement ban khlong mawshun hapoh u pud u sam jong ka shnong Daistong.
Ha kane ka jingleit tur sha DC ophis kila ia pyrta ba ki dawa ba dei ban pynsangeh noh mardor ia ka jingsngap paidbah ia kaba la buh sngi ban long ha ka 22/Jymmang/2026 ha shnong Daistong ha kaba sdang ki pulit kila ia pyrshang ban nym ai lad ba kin ioh rung hynrei kala don ka jingiakhun bad ha kane ka jingialeh kila ioh ban rung hapoh DC ophis.
Na ka liang ki paidbah kila ia pyrta ba ka Shree Cement ka dei ban leit phai noh bad kala don ruh ka jingiapyrta ban pynrem ia u Deputy Commissioner, ban pynkynmaw ba ka JNC bad ka JSU ryngkat ki trai shnong ka Daistong kila wan sha Shillong haka 18/Jymmang/2026 ban dawa da dei ban pynsangeh ia ka jingsngap paidbah ban khlong mawshun ka Shree Cement ha shnong Daistong.
