Shillong,Jymmang 20:Ka jingiakhun kaba shyrkhei, ba itynnad bad biang bor bha ka la mih paw biang sa shisien ha ka lympung ialehkai ka MSL 5 ka Meghalaya Football Association, hadien ba ka jingiakhun hapdeng ka Nongkseh SSCC bad ka Shillong Lajong FC naka bynta ka wat kaba ar ka quaterfinal league, ka la kut noh ha ka jingiakhaid kaba long da mar shi kol.
Kaba shwa ia kane, ka kynhun ialehkai ka Mawlai SC, ka la lah ba kan pynliem ia ka Rangdajied United FC da 4-0.
Kampher wat hadien ba kine ki ar kynhun ki dang shu dep ba kin iakhun hapdeng para maki ar sngi shwa, ha kaba ka Nongkseh ka la jop da 2-0, pynban ki paid nongkyrshan ki ar kynhun, ki la wan ban ia sakhi bad ban ai mynsiem ia la ki rang ialehkai.
Na ka liang ka Nongkseh ia ka shi kol ka jong ka, la ioh ban thep da u Mebankhraw Wahlang (33′) kaba la wan lyngba ka corner ba la shut da u Hardy Cliff Nongbri.
Ia kaba ym slem hadien kane, ka Lajong ruh ka la lap ba ioh ban pynphai kylla noh ia kane ka shi kol ba ka la shah tam lyngba u Fridison Wanniang (37′) ha kaba ka bol ba la shut jam bha ka la sam lyngba ki kjat u rangap kol ka Nongkseh u Guidle Syiemlieh.
Wat la kane ka jingiakhun ka la kut noh ha ka jingiakhaid, kine ki ar kynhun ki la lah shisha ban pyni ia ka jingialehkai kaba itynnad bad ba pynhun mynsiem hi jrut ia ki paidbah nongleit peitkai.
Ha kawei pat ka jingiakhun, ki ar kol lyngba u Basuklang Bina (14′, 39′), Fairming Suting (66′) bad Samlang Rympei (90’+4)., ka la biang pura ia ka Mawlai SC kaba bat ruh ia ka nam kum ka lahduh kane ka lympung ba kan lah ban pynliem ia ka Rangdajied United FC, kaba da kane ka namrem kaba mynta ka sngi, ka lynti ia ka Rangdajied ban lah ban ioh rung sha ka semifinal ka la long kaba jngai bah bad ba dang sah sa artylli ki jingiakhun ba kan pyndep.
Haba phai sha ka miej iakhein point ka Nongkseh ka don ha ka kyrdan ba halor duh hadien ba ka la ioh ba kan khur 8 point, bud pat sa ka Lajong 7 point, Mawlai 7 point bad don ha ka kyrdan kaba lai, Rangdajied 0.
Lashai pat ka sngi, ka jingiakhun kan dei naka bynta ka Group B ha kaba Rymbai Shkenshynriah SC kan iakhun pyrshah iaka Maram FC ha ka por 2 baje mynsngi, katba ka Langsning FC kan iakhun pyrshah ia ka Nangkiew Irat FC kaban long ha ka por 6 baje janmiet.
