Shillong, May 20: Ka Meghalaya Board of School Education (MBOSE) ka la pynmih da ka jingpynbna na ka bynta ban khot aplikashon ia ki nongai eksamin shimet ne ki Private Candidates na ka bynta ka Secondary School Leaving Certificate (SSLC) Examination.
Kane ka jingthmu ka long ban pynkhlain ia ka jingnang jingstad kaba la kynthup lang ia baroh da kaba ai lad sa shisien ia ki nong pule kiba ym lah ban leit skul bad na kiwei kiwei ki daw. Ka ai lad ia ki nongia eksamin ba kin pyndep ia ka jingpule jong ki jong ka SSLC.
Katkum ka jing khein jong ka UDISE, ka jylla ka lah don haduh 8.40 lak ki bym leit skul shuh, ha kaba kane ka pyni ia ka jingdonkam kyrkieh ban pyniar ia ki lynti pule bad eksamin kiba lah ban pynkylla.
Ha kane ka liang, ka jingpynbiang lad ia ki nongiakhun eksamin shimet (Private Candidates) ka dei ka sien jam kaba kongsan tam ban pynthikna ba ka jingnang jingstad ka poi sha baroh ki briew.
Ka Board ka la bynrap da kaba pynshai ba yn nym don ka jingbuh ia ka rta na ka bynta ki Private Candidates kiba aplai ia ka eksam SSLC, namar kane, ka jingplie lad ia ki nongpule na ki kyrdan rta baroh kiba kwah ban pyn kut ïa ka jingpule bad ïoh ia ka syrnod na ka bynta baroh.
Ki nongpule kiba don jingmut ban aplai ki lah ban leit aplai sha ki jaka ba la pynbeit hajan, ha kaba kane ka pynsuk bad pynjem ban pyndap ia ka kot aplikeshon.
Ki nongpule ki la shah bthah ban pule bha ia kane ka jingpynbna, kynthup ia ki kyndon ban ioh, ki kot ki sla ba donkam, ka bai eksamin bad ka rukom ban phah ia ki kot ki sla jong ki bad ban aplai ha ka por ba biang.
Ka MBOSE ka pyn kynmaw biang ia ka jingkut jingmut ban pynthikna ba baroh ki nongleit skul ba kin ioh lad marpa, bad ka pynthikna ba ki lynti ioh syrnod (certificate) ki plie bad long kiba kynrei na bynta baroh ki nongpule.
Ki nongioh bynta, ki skul bad ki dkhot ka imlang ka sahlang ki la iohpdiang ka jingkyrpad ban pynphriang kylleng ia kane ka jingpynbna ban pynthikna ia ka jingpynsngewthuh bad jingiashim bynta kaba paka.
