Shillong, Jymmang 20:Ha ka jingtrei shitom ban kyntiew bad pynshai shaphang u nombar ne Single Emergency Number ‘112’ hapoh ka Emergency Response Support System (ERSS), ka ophis treikam jong u District Magistrate, East Khasi Hills District, Meghalaya, u la kyrpad ia baroh ki Block Development Officers (BDO) ha ki district ban pynlong ia ka jingpyntip bad pynshai shaphang une u nombar 112 ha ki jaka bapher bapher.
Ka Emergency Response Support System ka ju iai pynbiang ban shakri ia ki paidbah naduh ba dang wanrah ia ka ha u 2018. Lyngba ki snem, kane ka prokram ka la pynieng ia ka thong pyllong ban ai ia ka jingiarap ha ki por iakynduh jingeh kaba la treikam janai mynta bad kaba shakri ia ki nongshong shnong ha ki jaka bapher bapher
Ka ophis u District Magistrate ka la ong ba ka jingjop kaba khraw tam jong ka jingshakri kaba kongsan ka shong jur ha ka jingtip paidbah. Ban pynthikna ba kane ka jingshakri ka biang katkum ka thong ba la buh, ka long kaba donkam ban pyniar bad pynpoi shispah khnang ba man u nongshong shnong un tip ia ka jingiarap ba ka Sorkar ka pynbiang lyngba une u nombar.
Ka jingthmu jong kane ka long ban pynlong da ki prokram ialap sha ki paidbah. Haba ki paidbah ki la bna ne tip shaphang kumno ban ioh jingiarap ki la lah ban phone beit ha une u nombar ‘112’ bad ka jingiarap kan poi ha ka por ka jingdonkam kyrkieh.
