Shillong, Jymmang 27: Mynta ka sngi ka 27/Jymmang/2026, ka kabinet ha ka jingialang la shim iaka rai ban wanrah ia ka jingpynkylla haba iadei bad ka ain Meghalaya Forest Authority Act, 1991, ka jingmut jong kane ka ain ka long ban iarap ha ka jingiatreilang hapdeng ka sorkar jylla bad ki District Council khnang ba ban dup lah ban pyntreikam ia ki kyndon bapher bapher.
U Myntri Rangbah ka jylla, haba kren ha ki lad pathai khubor, u la ong ba ia kane ka ain ym shym la lah ban pyntreikam pura namar ba ia ka bor ha kaba iadei bad ka liang pisa ym lah ban pyndonkam ba dei halor kane ba ka tnad ain ka la kdew ia kane ka jingbakla bad kane ka jingpynkylla ka long ba kumno yn lah ban pyntreikam pura ia ka ain ha kaba ki lah ban pyndonkam ia ka pisa.
Kawei pat ka rai kaba la shim ka long ha ka jingpyndonkam ia ki kyrdan bad kyrteng ha ki kali sorkar bad ia kane la aiti ha ka tnad ka kit ka bah ba kan shim ia ka rai kiei kiba lah ban thoh ia ka jingwah kyrteng ha ki kali sorkar bad mynta ka sngi ka tnad ka kit ka bah ka la wanrah ia ka thup jong kito kiba lah ban thoh kyrteng ia kaba ka kabinet ka la pdiang.
Ka kabinet ka la shim ruh ia ka rai ban plie ia ka lad ba kiba buh kali kin siew shisien iaka khajna kaba ki la pynsah ia ka khajna kaba dei bad ka jingkit ia ki briew kaba la tip kum ka Passenger Tax, ka khajna ia ki mar ki mata kaba la tip kum ka Goods Tax bad ka khajna ia ka jingbit jingbiang ka kali kaba la tip kum ka Fitness Tax.
U Myntri Rangbah u la ong ba don bun bah kiba buh kali ban kamai kiba kamai ha kine ki 20 snem ba la dep bun na kiba buh kali kamai kaba kim shym la pynthymmai iaki kot ki sla na ki daw kiba bun, ka khajna kam dei kaba heh hynrei kaba heh dei ka kuna kaba ki shim 50 tyngka shi sngi lada dei ka Fitness Certificate.
