New Delhi, Jymmang 27: Ka Tnad ba dei peit ïa ki samla, ka Tnad Youth Affairs & Sports, ryngkat ka jingïatreilang bad ka MY Bharat, kan pynlong ïa ka “Chintan Shivir – Purvottar” kaba ar sngi ha ka 29–30 tarik Jymmang 2026 bad ka “Nasha Mukt Yuva for Viksit Bharat” Conclave kaba shi sngi ha ka 28 tarik Jymmang 2026 ha Indian Institute of Management (IIM), Shillong, Meghalaya.
Ia ki sienjam la pynlong kum shi bynta jong ka jingthmu kaba kham iar jong ka Sorkar ban tei ia ka jinglong jingman ha kaba ki samla kidei kiba la shah pynkupbor bad kiba don ka jingkitkhlieh ha ka imlang sahlang kaba iahap bad ka jingthmu jong ka Viksit Bharat @2047.
Ki prokram kin wanrah lang ïa ki heh ophisar jong ka Tnad ba dei peit ia ki samla, ka MY Bharat, ka MY Bharat-NSS, ki District Youth Officer, ki Regional Director, ki riewshemphang, ki kynhun kiba treikam ha ka imlang sahlang bad ki samla kiba don bynta na kylleng ka thaiñ shatei lammihngi.
Ka “Nasha Mukt Yuva for Viksit Bharat” Conclave kan pynleit jingmut ha kaba weng ia ka jingeh kaba nang kiew jong ka jingdih pynbuaid hapdeng ki samla, khamtam ha ka thain shatei lammihngi jong ka ri India, lyngba ka jingpynsngewthuh, ka jingiatreilang bad ka jingiatreilang ha ka imlang sahlang kaba ialam da ki samla.
Kane ka pyni ba ki jylla jong ka thaiñ Shatei Lammihngi ki mad ïa ka jingban khia kaba jur jong ka jingpyndonkam ia ki jingdih pynbuaid namar ki jingduna ha ka thain bad ka jingbun ki lad ban khaii beain ia kine ki jingdih.
Ka jingialang ka thmu ban pynsngewthuh ia ki nongshim bynta shaphang ki jingktah kiba sniew jong ka jingdih pynbuaid, ban pyni ia ki rukom treikam kiba bha tam kiba la pynshong nongrim ha ki sakhi bad ki rukom treikam na ka bynta ka imlang sahlang, ban pynkhlain ia ka jingiatreilang hapdeng ki tnad bad ban pynshlur ia ki samla ba kin long ki nongmihkhmat jong ka ri India kaba lait na u drok.
Ha kane ka prokram yn don ki jingpynshai halor ka MY Bharat Portal bad ka Nasha Mukt Yuva na ka bynta ka Viksit Bharat Abhiyan, bud sa ki jingïalang kiba ïadei bad ki phang pdeng halor ki rukom iada na ka jingdih pynbuaid bad ka jingai jingiarap.
Ka Myntri Khynnah ba dei peit ia ka Tnad kam ialehkai ka Raksha Nikhil Khadse kan ai jingkren sha ki nongïashim bynta ha kane ka jingialang.
Ki nongmihkhmat na ki seng kiba trei ha ka kam ba iadei bad ka jingpyllait na ka jingdih drok bad ka jingai jingiarap ha kylleng ka thain shatei lammihngi jong ka ri India kin pyni ia ki rukom treikam kiba bha tam bad ki nuksa na ka bynta ban iada na ka jingdih pynbuaid. Ka jingialang kan kut noh da ka jingsmai lang ia ka Nasha Mukti kaba pynskhem biang ia ka jingkut jingmut ban tei ia ka imlang sahlang kaba lait na u drok.
Ka “Chintan Shivir – Purvottar” ka ban long ha ka 29–30 tarik u Jymmang 2026 kadei kaba la saindur kum ka rynsan kaba la buh ryntih na ka bynta ka jingïamir jingmut, ka jingpynïahap ïa ki polisi, ka jingkyntiew ïa ka jinglong nongïalam bad ka jingpynkhlain ïa ki jaka treikam hapoh ka Tnad ba dei khmih ia ki samla.
Ka Chintan Shivir ka ialeh ban pynshlur ia ka jingsaindur thymmai ha ka jingsynshar, ban kyntiew ia ka jingiatylli ha ka seng, ban kyntiew ia ka jingpynkylla thymmai ia ka teknoloji, ban pynkhlain ia ki sap jinglong nongialam bad ban pynsuk ia ka jingpynsaphriang ia ki rukom treikam kiba bha tam na ki jingshem ba wan na ka jingtreikam.
Ki jingïamir jingmut ba ar sngi kin kynthup ïa ki jingïalang ban wanrah ia ka jinglong nongialam da ki nonghikai jong ka IIM Shillong, ki jingïamir jingmut halor ki sienjam ban shim ha ka shi snem, ki jingbatai shaphang ka jingiadei bad ki samla lyngba ki lad digital lyngba ka MY Bharat Portal, ka jingpynkhlain ïa ki jaka treikam jong ka NSS bad ki jingïakren ha ki kynhun na ka bynta ki jingai jingmut ba ïadei bad ka jingtreikam.
Ha ka jingialang plie ha ka 29 tarik Jymmang 2026 yn don ka jingkren ba kongsan na u Myntri ka sorkar pdeng u Dr. Mansukh Mandaviya, ka MoS Raksha Khadse, Secretary Tnad ba dei khmih ia ki samla Dr. Pallavi Jain Govil bad u Additional Secretary Nitesh Kumar Mishra.
Ka sngi kaba ar jong ka Chintan Shivir kan pynleit jingmut ha ka jingpynwandur ia ki lad ki lynti, ki jingkut jingmut ban shim ia ki sienjam bad ki jingai jingmut ia ki polisi lyngba ki jingbatai jong ki kynhun bad ki jingiamir jingmut lang.
La pynkhreh ruh ban pynlong ia ki jingialang halor ka jingwanrah ia ka jingiatreilang ha ka imlang sahlang, ka Fit India, ka Prime Minister Internship Scheme bad ki rukom treikam kiba iadei bad ki samla kum shi bynta jong kane ka prokram.
Ka Tnad ka khmih lynti ba ki jingïamir jingmut kin wanrah ïa ki jingai jingmut kiba lah ban pyntreikam, kiba ïahap bad ka Vision 2047, ban pynkhlain ïa ka jingïatreilang jong ki jaka treikam, ban buh jingtip shaphang ki sienjam ba lah ban pynbud lang bad ban kyntiew shuh shuh ïa ka jingïashim bynta jong ki samla ha ki sienjam ban tei ïa ka ri.
