Jowai, Jylliew 02: Ka jingialang High Level ba kynthup ia ki nongmihkhmat na ka sain pyrthei, ki Heh Ophisar bad ki Pulit, bad nongmih khmat na ki District Council n aka Sorkar Meghalaya bad Assam, la pynlong mynta ka sngi ha Assam Police Camp ban iakren halor ki kam ba iadei bad ka jingiakajia pud ha ka thain Lapangap.
Ia kane ka jingialang la pynlong kum ka jingpynbteng ia ka sienjam bala shim ha ka kyrdan ba halor eh da u Myntri Rangbah ka Meghalaya, uba dang shen ula shong iakren bad u Myntri Rangbah ka Assam da ka jingthmu ban wad ia ki lad ki lynti ba mynjur lang bad ba jai jai ban punbeit ia ki jingeh kiba mih ha ka thain.
Haba pynbud ia kine ki jingiakren, la shim ia ka rai ba kan don ka jingialang na baroh arliang kaba kynthup ia ki nongialam sain pyrthei, ki heh Ophisar, ki nong mihkhmat ka thain ban pynsuk ha kaban shim ia ka rai ba mynjur lang.
Kiba mihkhmat ia ka Assam ki long u Dr. Tuliram Ronghang, MLA and Chief Executive Member, Karbi Anglong Autonomous Council (KAAC); Shri Amarsing Tisso, Member of Parliament; Shri Ajay Kumar Tiwari, IAS, Additional Chief Secretary (Home & Political); Shri Surjya Rongphar, MLA and Executive Member, KAAC; Shri Lunsing Teron, MLA and Executive Member, KAAC; Shri Habbey Teron, MLA; Shri Niso Terangpi, MLA; Shri Avijit Kro, Deputy Speaker, KAAC; Shri Headsing Rongphar, Member of Autonomous Council, KAAC; Smt. Preeti Kumari, IAS, Deputy Commissioner, West Karbi Anglong; bad Shri Dinesh Kumar, IPS, Superintendent of Police, West Karbi Anglong.
Kiba mihkhmat ia ka Meghalaya ki long Shri Sniawbhalang Dhar, Hon’ble Deputy Chief Minister; Shri Frederick R. Kharkongor, IAS, Principal Secretary; Shri Cyril V. Diengdoh, IAS, Commissioner & Secretary; Shri Garod L.S.N. Dykes, IAS, Secretary; Shri Thombor Shiwat, Chief Executive Member, Jaintia Hills Autonomous District Council (JHADC); Shri Abhinav Singh, IAS, Deputy Commissioner, West Jaintia Hills District; bad Shri Jagpal Singh Dhanoa, IPS, Superintendent of Police, West Jaintia Hills District.
Hadien ka jingiakren kaba bniah bha, ka jingialang kala shim ia kine ki rai harum, Ki nongshongshnong ka Lapangap ki iai bteng ban leit rep kba ha ki jaka them jong u lum ba don ka jingiakajia.
Ki nongshongshnong ka Tahpat kin iai bteng ban rep ia ki jingthung kat kum ka aion kum ka kait, sohtrun, sying bad kiwei kiwei ki jingthung halor u lum bad ki jaka ba sharing.
Ka kam ba iadei bad ka jingphiah ia u pud ba shirta ha ka jaka ba don jingiakajia yn sa shong pyrkhat bad shim rai da ki committee kiba dei ha ka kyrdan jong ki Jylla.
Baroh arliang mamla kin hap ban pynneh ia ka jingsuk, ka suk ka sain bad kin kiar ban leh ia kino kino ki kam kiba lah ban pynmih jingkulmar lane ktah ia ka jinglong ka suk ka sain ba long mynta.
Lah ban kdew ba ka jingialang ba hashuwa jong ki nongmihkhmat na ki Shnong la pynlong ha ka 18 tarik Jymmang, 2026, kaba la pynbeit da u Deputy Commissioner bad Superintendent of Police, West Jaintia Hills District, kala sahkut khlem ka jinglah shim rai namar ki jingiapher ki jingsngew haba iadei bad ki jait rep kiban shah ha ka thain. Ka jingialang ba mynta la pynlong kumka jingpynbud ia ka jingiasngewthuh jingmut hapdeng ki ar Sorkar Jylla ban wanrah ia ka lynti kaba iapdiang lang da baroh.
Ka rai kaba la shim mynta ka sngi ka pyni ia ka jingkut jingmut jong baroh artylli ki Sorkar bad ki kynhun ba don bynta ha kaban pynneh ia ka jingsuk, iada ia ka jingmyntoi ki trai shnong, bad pynbeit ia ki jingeh ba sahteng lyngba ki jingiakren bad jingiatreilang.
