Shillong, Jylliew 02: Ka kynhun ki seng bhalang ka Mawsynram C&RD Block kaba kynthup ia ka seng HNYF, HYC, bad FKJGP ki dang pynkhreh mynta ban lum ban lang ia ki paidbah ban leit tur sha Secretariat ban dawa na ka sorkar ba kan weng noh mardor ia ka SAI Computer Limited na ka MePDCL Mawsynram Sub Division namar ki kam leh thurmur ha kaba ia dei bad ka bai light.
U bah Kyllang Thongni u nongialam ka seng HNYF haba kren ha ki lat pathai khubor u la ong ba kum ka dak jong ka jingpyrshah ia katei ka kompani u la dep leit ban pynpaw ia ka jingpyrshah ha iing sah jong u myntri kam bor ding ka jylla u bah Metbah Lyngdoh ha Upland Road Laitumkhrah Shillong.
Na ka liang ka kynhun ki seng bhalang ha ka jingiakren bad u myntri ka kam bor ding kila ai por ar taiew ia ka sorkar hadien ba u myntri kam bor ding u la ong ba ia kane ka kam un hap ban ia kren bad u myntri rangbah, hynrei kane ka ar taiew kala kut na ka liang ka sorkar kam pat ai kano kano ka jingpyntip ha kaba iadei bad ka jingdawa ban weng noh ia ka SAI Computer Limited na ka MePDCL Mawsynram Sub Division.
Ka daw kaba la pynlong ba ki hap ban pyrshah ka dei halor ka nongrim ba kane ka kompeni kala pynkiew palat pud ia ka bai light la iathuh ba ha ka por ba ka MePDCL ka dang lum hi ia ka bai light, khamtam na kito ki longiing kiba ioh ia ka light duk ka dor bai light kan nym palat ia ka T.250/- hynrei mynta ki don ki longiing kiba ioh bill light T.800/- haduh T.1000/- kane ka long ia ki longiing kiba ioh ia ka light duk.
Hynrei haba phai sha kiwei pat ki iing ki sem ka jingkiew ka bai light kala long palat ia ki iing kiba ha sor Shillong, kum ki skul ki poi da ki phew hajar bad don ruh kiba ioh ia ka bill light palat lak tyngka dei halor kane ka nongrim ba ki sa pyrshah ba dei ban weng noh ia kane ka kompeni namar ki kam thurmur jong ka bad kane ka long ka khubor sha ka sorkar ba lada ka sorkar kam lah ban pynbeit ia kane,ka kynhun ki seng bhalang bad paidbah kin hap ban leit tur sha Secretariat.
