Shillong, Jylliew 02: Mynta ka sngi 02/Jylliew/2026 kala don ka jingiakynduh lang hapdeng ki nongialam ka Seng Khasi Seinraij ha Seng Khasi College Shillong ha kaba kila ia kren bad iathir ha kano ka kyrteng ban thoh ha ka khana samari kaba dang iaid mynta ia kiba dang bat bad ksoh ia ka niam tynrai.
Hadien ka jingiathir kaba sani kala poi ha kawei ka jingiasngewthuh jingmut lang ba kin thoh sha ka tnad kam pohiing jong ka Ri India bad ha kajuh ka por ba baroh kiba dang bat bad ksoh ia ka niam tynrai ba ha ka khana samari ha ka bynta ba ju thoh ia ki jait niam bapher bapher na ka bynta ki Seng Khasi Seinraij la ia rai lang ba dei ban ithuh ha ka jingthoh Niamkhasi Niamtre.
Haba kren ha ki lat pathai khubor u bah P.D. Nongrum vice president Seng khasi kmie u la ong ba kila poi sha kane ka rai namar ba ki kwah ban da ithuh ha ka jingthoh ia kiba dang pynneh pynsah ban bat bad ksoh ia ka niam tynrai namar ha ki khana samari kiba la dep ia kito kiba dang pynneh pynsah ia ki niam tynrai la thoh ha ka ktien nongwei other religions.
Ha kajuh ka por na ka liang ki nongialam Sengkhasi Seinraij kila ia kren sani halor ka jingshah mushlia ia ki riti ki dustur u khun khasi naduh ba wan u khar lieh haduh mynta mynne hapoh jong ka jingpeit jong ka District Council kum ka jingweng ia u syiem ka Hima Mylliem bad ka jing bym ai sanat ia u bah Remdor syiem ka Hima Sohra.
La kren shai haba ki ong kumtei kam mut ba ki pyrshah ne iashah hynrei ki kwah ban iohi ba dei ban pynneh pynsah ia ki riti ki dustur jong ki it ki hima kiba dang bat ia la ka tynrai na ka liang jong ki nongialam Sengkhasi kim don eiei ban ong la ki thung iano iano ruh hynrei kaei kaba ki kwah ba dei ban burom ia ki riti ki dustur kiba la don namar ki lai tylli ki hima ki dei kiba bat ia ka riti ka dustur, ka Hima Sohra, ka Hima Mylliem bad ka Hima Khyrim.
