Mawphlang, Rymphang 03: Ki paidbah ba iaid ba ieng ha ka surok kaba la tip kum ka MB Road kaba mud Mawphlang Balat Road, kim lah khlem da khniun ia ka jingsniew jong kane ka surok khamtam eh kaba hap hapoh jong ka Mawphlang PWD Division.
Haba u SP News u la ia kynduh ia kiba bun na ki paidbah katei ka thain kila ong ba kane ka surok kam juh bha mynta da ki phew phew snem bad kim tip shuh la ka PWD Mawphlang Division ka phah maramot ne em ia kane ka surok kaba la pyniasoh ia ki bun tylli ki constituency.
La don ruh ka jingkynthoh ba na kane ka surok ki MLA kiba iaid lynti ki long u MLA jong ka Mawsynram, MLA jong ka Langrin, MLA jong ka Mawkyrwat bad khamtam eh ia u MLA jong ka Mawphlang u ba dei u MLA jong kane ka jaka.
Ka PWD ha u snem 2013 shuwa ka MLA election ka la khot ia ka tender ban maramot ia kane ka surok naduh Mawphlang sha duh Balat ha ka jinglut kaba 12 klur tyngka, hynrei haduh mynta la iohi tang ia ki maw kiba buh ha rud surok katba ka jingtrei pat kam pat sdang.
Haba phai pat sha ka PWD Division kaba hap hapoh jong ka Mawsynram na Jingkieng Umlangmar sha Rum ka jingtrei ka la iaid bad bun na ki jaka kiba la jot la pei ka surok la lah ban maramot.
Ha kine snem kiba la dep ka jingkynnoh ka la leit sha u MLA u ba rim u Bah JA Lyngdoh ba u khlem leh ei ei ban pynbha ia kane ka surok bad mynta la wan da u MLA ba thymmai u Bah Kenedy Khyriem hynrei kane ka surok ka dang sah kumba ka long. Ki paidbah kiba iaid na kane ka surok kim kynnoh iano iano hynrei ki kwah ba kane ka surok kan bha.(SP News)
