New Delhi, Jylliew 05: U Myntri kam pohing jong ka sorkar pdeng bad u Myntri ka tnad iatreilang, u Amit Shah u la leit jurip ia ka Lankamura Border Outpost (BOP) jong ka BSF ha Tripura bad ai mynsiem ia ki shipai da kaba iakren bad ki nongiada ia ka thain khappud.
Ha ka sngi rakhe ia ka World Environment Day, u Myntri kam pohiing ka sorkar pdeng u la thung ia u dieng agar ha Agartala, ka nongbah jong ka jylla Tripura, kum shi bynta ka prokram thung dieng.
Ha kane ka sngi, u Myntri Rangbah ka Tripura u Dr. Manik Saha, u Union Home Secretary, u Director jong ka Intelligence Bureau, u Secretary (Border Management), bad u Director General jong ka Border Security Force, ryngkat ki katto katne kiwei pat ki kynrem ki lyndan ki la iadonlang.
Ha ka jingai jingkren jong u ha kane ka sngi, u Myntri kam pohiing ka sorkar pdeng uba dei ruh u Myntri ka tnad treilang u Amit Shah u la ong ba la pynlong ruh ia ka prokram thung dieng hangne mynta ka sngi.
U la ong ba naduh u snem 2019 haduh mynta, ki briew na baroh ki Central Armed Police Force (CAPF) jong ngi ki la thung palat 7.5 klur tylli ki dieng. U la iathuh shuh shuh ba mynta u snem, yn thung hapdeng 40 lak haduh 60 lak tylli ki dieng, bad baroh kito ki tynrai dieng kiba khlem lah ban im yn sa thung thymmai biang.
U la bynrap ba ha u snem ban wan, ki shipai CAPF kin thung 2 klur tylli ki dieng, da kaba noh synniang ban iada ia ka mariang bad ban shakri ïa ka ri.
Ha ka World Environment Day mynta ka sngi, u Amit Shah u la ban jur ia ka jingdonkam ban pynneh pynsah ia ka mariang bad ia ki kam ba la leh da ka sorkar Modi ha kane ka bynta.
U Shah u la ong ba ka Ozone layer kadei kaba pynlong ia ki kjat sngi ban long kiba biang na ka bynta ki briew bad kiwei kiwei ki jingthaw ba im. U la bynrap ruh ba tang kawei ka lad ban weng ïa kane ka jingeh ka long ban pynbun ïa ki dieng.
U Myntri kam pohiing jong ka sorkar pdeng u la ong ba u Myntri Rangbahduh ka ri u Narendra Modi u la shim bun tylli ki sienjam ha kajuh ka por na ka bynta ban iada ia ka mariang.
U la ong ba ha kane ka bynta, la ithuh ia ka rukom treikam jong ka India kum ka rukom treikam kaba long ka nuksa ha ka Paris Conference.
U Shah u la ong ba da kaba pynurlong ia ki thong jong ka Paris Agreement hashwa ka por, ka India ka la pyni ia ka jingkut jingmut jong ka ban iada ia ka mariang, kumba la paw ha ka khubor jong ka jingpynneh pynsah ia ka mariang ha ka Rigveda, hakhmat ka pyrthei.
U la ong shuh shuh ba baroh ki shipai CAPF ki sumar bha ia uwei pa uwei u tynrai dieng da kaba khein ia u kum u dkhot jong ka iing ka sem jong ki.
Kane kam dei ban long ka prokram kaba la pyniaid da ki hukum jong ka sorkar, hynrei kadei ban long ka jingmlien kaba man ka sngi, namar dei kane ka jingmlien kaba lah ban iada ia ngi.
U Amit Shah u la ong ba mynta ka sngi la pyndep ia ka jingplie paidbah lyngba ki lad digital ia ki jaka sah jong ki shipai ha ka 37th Battalion jong ka Border Security Force (BSF) bad ka jingbuh maw nongrim lyngba ki lad digital ia ka Quarter Guard complex ha ka 97th Battalion jong ka BSF.
U la ong ba ka Sorkar Modi ka la shim katto katne ki sienjam ban kyntiew ïa ki lad ki lynti na ka bynta ki briew kiba pahara ïa ki thain khappud jong ka ri. La shimkhia ym tang ia ka koit ka khiah jong ki shipai hynrei wat ia ka iing na ka bynta kiba haiing jong ki.
U la ong ba tang ka jingkren shaphang ka BSF ka wanrah ia ka jingsngew burom hapdeng ki paidbah ka ri, kaba pyni ba ka ri ka iohi bad pdiang ia ki jingeh kiba phi iakynduh, bad ka ithuh ia ka jingeh, ka jinglen lade, bad ka jingaiti lut jong phi.
U Myntri kam pohiing jong ka sorkar pdeng uba dei ruh u Myntri ka tnad treilang u la ong ba ki shipai BSF ki don ka jingkitkhlieh ban iada ia ki thain khappud. U la ong ba kine ki pud ki sam kiba iar ki wanrah ïa ki jait jingeh bapher bapher ha ki jaka bapher bapher. U la ong ba ka Sorkar Modi ka la rai ban shna ïa ki “smart border” ha kano kano ka jaka ba don ki shipai Border Security Force (BSF) bad Sashastra Seema Bal (SSB).
Hapoh ka rukom pahara kaba don saw bynta, ka jingthmu ka long ban pynlong ia ki pud ki sam kiba skhem da kaba pyniasoh lang ia ka bor synshar ha ka thain, ka teknoloji, bad ka jingaiti lut jong ki shipai. U Shah u la ong ba ka jingmut jong ki smart border ka dang don ha ka bynta ba khatduh bad shen yn sa sdang ia ka projek.
U la bynrap ruh ba ïa kane ka jingpyrshang yn pyntreikam ha ki hynniew ne phra tylli ki jaka ha kylleng ki thain khappud bapher bapher jong ka ri ha kajuh ka por. Yn sa pynbeit ia kino kino ki jingeh kiba nyngkong kiba la iakynduh ha ka por ba pynlong ia ka jingpyrshang, hadien kata yn sa pynheh ia ka sienjam ban kynthup ia ka thain khappud baroh kawei.
U Myntri kam pohiing u la ong shuh shuh ba ki District Magistrate, ki Superintendent of Police, ki village patwari, bad ki sarpanch ruh kin don ka bynta kaba kongsan ha kane ka phang.
U la ban jur ba tad haduh ba ym pat lah ban pyniasoh ia ki bor pyniaid shnong ha ki jaka khappud ha kane ka jingmut, ym lah ban pynlong ia ki khappud kiba ym lah ban rung shisha. U la ong ba ka jingmutdur ia ka jingshngain ka thain khappud ha ka jinglong marwei kan ym long kaba jop satia.
U Amit Shah u la ong ba ka Tripura Frontier ka long kaba donkam bha na ka bynta ka jingshngain jong ki thain khappud jong ka ri. U la ong ba, na ka bynta ban pynthymmai ïa ka jingker ia ka thain khappud, ngi la mynjur ruh ban buh ïa ki jingker ba thymmai kaba jrong 119 kilomitar ban bujli ïa ka bynta jong ka jingker kaba jrong kumba 650 kilomitar kaba la palat 15 snem.
U la ong shuh shuh ba katto katne ki projek kiba thmu ban kyntiew ïa ki jingdonkam na ka bynta ki shipai ha ki border outpost -kum ka jingpynbiang bording, ki sienjam ba iadei bad ka bording kaba khuid, bad ka umdih kaba khuid—ym tangba la sdang hynrei la pyndep ruh.
U Myntri kam pohiing jong ka sorkar pdeng u la ong ba ka Tripura kadei ka jylla kaba don jingsngewkhia bha kaba la ker da ki jaka khappud na ki lai liang. U la ong ba u Myntri Rangbahduh ka ri u Narendra Modi u la buh ia ka jingthmu ban pynlong ia ka ri India ka ri kaba la kiew shaphrang shuwa u snem 2047.
U la ong ban pynurlong ia kane ka thong dei ban pynlong shwa ia ka ri India kaba shngain. Dei ban iada ia ka ri na ka jingkhaii tuh, ka jingkhaii briew, ka jingdih drok kaba ktah ia ki samla.
U Shah u la ban jur ba ka Sorkar India ka la shimkhia ïa ka kam ban shna ïa ka smart security grid kaba pynthikna ïa ka jingshngain ha baroh ki bynta. U la ong ba ka donkam ban pynkylla ia ka jingmut baroh kawei jong ka jingker ia ka thain khappud bad ka rukom treikam jong ngi.
Kan long ka jingkitkhlieh jong ngi ban iada ia ka ri bad ki pud ki sam jong ka na man la ka jingsniew kaba ktah ia ka imlang sahlang jong ngi. U Myntri kam pohiing u la bynrap ba ïa ka jingmut jong ka smart fencing bad ka quadrilateral security grid la pynïasoh lang bad ka rukom treikam jong baroh ki Central Armed Police Force ba don ka jingkitkhlieh ban iada ïa ki thain khappud ha ki sngi ban wan.
Hapoh kane ka prokram thung dieng, baroh ki ophis jong ka Tnad kam pohiing ha kylleng ka ri, kynthup ïa ki Central Armed Police Force (CAPF), Assam Rifles, National Security Guard (NSG), Delhi Police, Narcotics Control Bureau (NCB), National Crime Records Bureau (NCRB), National Investigation Agency (NIA), Bureau of Police Research and Development (BPR&D), National Disaster Response Force (NDRF), National Disaster Management Authority (NDMA), bad ka Inter-State Council Secretariat (ISCS), ki la thung palat 5 lak tylli ki tynrai dieng ha kylleng ka ri mynta ka sngi.
