Shillong, Jylliew 09: Ka Meghalaya kala rai ban pynsangeh shuwa ia baroh ki jingleit shabar ri bala bei tyngka da ka Sorkar da ki Myntri Sorkar, ki MLA bad k Ophisar Sorkar na ka bynta ka por ba hynriew bnai kum shibynta jong ka jingpyrshang ban pynduna ia ka jingpynlut pynsep bad ka sienjam ban tyngkai ia ka pisa ka Sorkar.
Ia kane ka rai la shim na ka bynta ka jingmyntoi jong u paidbah ba bun balang. Kane ka sienjam kala wan ha ka por ba ki Sorkar ha kylleng ka Ri kila pyndonkam ia ka jingstad ha ka liang ka jingpyndonkam ia ka pla tyngka namar ka jingbym long thikna ha ka ioh ka kot na ki jingjia ba dang jia mynta ha ka pyrthei, kynthup ka jingiakynad sainpyrthei hapdeng ki Ri bad ki jingeh haba iadei bad ki jingdon jingem jong ka pisa ia pein bad ki bar ri.
Ka Sorkar Jylla ka ngeit ba ka jingpyniaid kaba stad ia ka jingpynlut pisa ka long kaba donkam bha ban pynthikna ba ki jingdon jingem kin iai long beit na ka bynta ki kam kiba kongsan bad ki jingkular ha ka roi ka par.
Kum ka jingmih na kane ka rai, phra tylli ki jingleit bar ri bad leit wat jingtip ba kynthup ia kumba 63-68 ngut ki Ophisar bad ki Nongmihkhmat na ki Tnad bapher bapher la pynsangeh shuwa.
Kine ki kynthup ia ki prokram ba iadei bad ka synshar khadar, ka jingpynroi ia ka kam ri jingri, ka jingnang pyndonkam ia ka um kaba lah ban pyndonkam ia ka Um ban lah iakhun pyrshah ia ka jingkylla ka suinbneng, ka rukom treikam ha ka koit ka khiah, ka jingpyntreikam ia ki project, ka jingsumar ia ka mariang bad ka rukom pyniaid ia ka kam jied nongmihkhmat.
Kane ka jingleit bar ri bala pynsangeh ka kynthup ia ki jaka kum ka United Kingdom, Denmark, United States, Japan, Thailand, Vietnam bad Argentina.
Ka Sorkar kala ban jur ba ia kane ka rai ym dei ban peit kum ka jingweng noh na ki jingpyniadei bad ki Ri ka pyrthei lane ka jingiasam ia ki jingnang jingtip.
Hynrei, ka pyni ia ka jingpynsangeh ba tang shipor ha ka jingpynlut pynsep na ka jingleit bar bar ri haba pynthikna pat ban pynbteng iaka jingpynleit jingmut ha ki kam ba kongsan ha ka synshar khadar hapoh ka Jylla.
Bun na kine ki jinghikai bad ki jingiatreilang bala thmu yn sa wad lad noh lyngba ka jingiakren online, ka jingiatreilang ha ka liang ka technical bad ki kabu ba hadien habud hadien bala kut kane ka por ba pyrrkhing.
La pyntip ba ka jingpynbna bala pynmih da ka Sorkar Jylla kam treikam satia ia ki jingleit bar ri kiba la bei tyngka da ka Sorkar India lane bala bei tyngka pura da ki Multilateral Development Bank, kaba shong pat ha ka jingioh jingmynjur na ka Ministry of External Affairs, ka Sorkar India.
