Shillong, Jylliew 10: Mynta ka sngi na ka liang ka Seng HYC Ri Bhoi Sepngi ha ka jingialam jong u Bah RC Thangkhiew bad u Bah P Makri ryngkat bad ki dkhot ka HYC kila pynkup burom ia ka Samla Ribansi Jammu ryngkat bad ka jingai sngewbha sha katei ka Samla Ribansi Jammu kaba la wanrah ia ka nam ka burom ia ka shnong ka thaw ia ka District Ri Bhoi ia ka jylla bad ia ka Ri India hi baroh kawei.
Ka samla Ribansi Jammu ka dei ka thei ialehkai kynjatbol na ka jylla Meghalaya kaba mihkhmat napoh ka Ri India ha ka lympung jingialehkai kynjatbol jong ki kynthei kaba la tip kum ka South Asian Football Federation kaba la long naduh ka 25/Jymmang/2026 haduh ka 6/Jylliew/2026 kaba la long ha Goa.
Ka Samla Ribansi Jammu kaba dang 17snem ka rta kaba la ioh ban mihkhmat iaka Ri India bad kaba dei ruh ka thei Samla kaba Ap Goal lane ka Goalkeeper bad ka Samla Ribansi Jammu ka dei kaba shong ba sah hapoh ka shnong Mynnar Jirang ha Ri Bhoi District.
Haba ioh ban iakren bad ka Samla Ribansi Jammu kala ong ba ia ka jingiaid lynti ka jong ka haduh ban da ioh mih khmat ia ka ri India kala ong ba kam dei kaba suk ban ioh mihkhmat ia ka Ri India.
Hynrei kum ka Samla ka hap ban mad shibun ki jingeh bad ki jingtynjuh hynrei ka trei shitom man la ka sngi ban poi ha katei ka lympung ia kynjatbol kaba heh hapoh ka Ri India bad ban ioh mihkhmat napoh ka jylla Meghalaya.
