Shillong, Naitung, 06: Ka jingkurup kaba khraw iaki tin dawai jyrhoh da ka Directorate of Revenue Intelligence (DRI), kala long ka jingtrei shitom ban teh lakam iaka kam khaii beain ia u drok bad pynduh pyndam noh ia kane ka kam khaii beain kaba la roi ha ki jylla bapher bapher, ha kaba la pynlong iaka jingkhynra ha Tripura bad West Bengal kaba hap hapoh ka jingpyniaid jong ka NDPS Act, 1985.
Ha ka 02 tarik, Naitung ,2026, ki ophisar ka Directorate of Revenue Intelligence (DRI) ki la bat iaki mar kiba iaid lyngba ki kali kit iaki jingsong synduk jong ka rel kaba thmu ban leit sha Agartala.
Ki la shem iaki mar beain kiba la burieh bha hapoh 80 tylli ki dabor nar, hapoh kawei ka syrtap jong u thit lane u powder uba long kum ka jingda ban burieh iaki mar.
Baroh kaba la kurup ne ioh kem ka long 55,626 tylli ki bitor dawai jyrhoh kiba don khleh bad u Codeine. Ia kane ka jingleit khynra la synran lang bad ka jingiarap jong ka Railway Protection Force (RPF) bad ki Assam Rifles. Ia uwei u briew, uba la wan ban pdiang ia kine ki mar, la synran bad kem noh mardor.
Ka Directorate of Revenue Intelligence (DRI) ka la hiar thma bad khynra ia kawei ka kynton iing buh mar ha Dankuni, West Bengal. Ha kane ka jingkhynra, ki sahep ki la lap bad kurup haduh 56,225 tylli ki bitor dawai jyrhoh ba don codeine. Ia kine ki bitor dawai la set bad tep hapoh 104 tylli ki tyndong nar rot.
Ban lait na ka jinglap ki bor sorkar, ki dkhot kane ka kynhun kila buhrieh ia kine ki bitor dawai hapoh ki pipe. Ki la tap pyn rben da u khyndew China nalor kine ki bitor dawai.
Baroh kine ki mar ba la kurup ki hap hapoh ki kyndon ka NDPS Act, 1985 (Narcotic Drugs and Psychotropic Substances Act). Baroh kyllum, ha katei ka jingkhynra ka la poi haduh 1.11 lak ki bilor dawai jyrhoh Codeine bad la kem noh ia uwei.
Ka Codeine ka dei ka dawai kaba la ioh na u kynja dih shon. Ka long kaba marjan ne iasnoh bad ki kynja jingdih pynbuiad. Wat la katta ruh, ka don ka jingdonkam kaba biang bad kaba thikna ban shna iaki dawai kiba iadei bad ka koit ka khiah, hynrei lada pyndonkam iaka da kaba sumar bad hapoh ka jingkhmih kaba bniah jong ki bor sorkar kiba dei peit iaka koit ka khiah.
Kine ki jingpynlong ka jingkhynra bad ka jingkem ia kine ki dawai, ka pyni iaka jingiai pyrshang kine ki kynhun beain ban lute ia kine ki dawai khnang ban ioh khaii tuh. Ki ju pyndonkam da ki buit kiba thymmai ban burieh ia kine ki dawai khnang ban nym ioh jingtip ki bor sorkar.
Da ka jingiatreilang bad ka jingstad bad jinglong kaba peitngor, ka kynhun DRI (Directorate of Revenue Intelligence) ka iai ieng skhem ban pynpra bad ban pynduh pyndam ia kine ki kynhun beain kiba pynjot iaka imlang sahlang.
