Shillong, Naitung 06: Kum ka jaidbynriew Tiwa kiba don antad 10,000 ngut ei ei kiba hap hapoh ka Hima Khyrim kiba dei ki riewlum ha kane ka jylla Meghalaya kila ia ksaid naduh u snem 2000 ban ioh ia ka jingithuh na ka jylla Meghalaya ba kin ioh ia ka syrnot Schedule Tribe hynrei haduh mynta ka sorkar bad ka KHADC ki dang sngap jar.
Haba kren ha ki Lat pathai khubor mynta ka sngi ha Shillong Press Club u General Secretary ka seng samla pule ka All Tiwa Student’s Union u Albert Dilar u la ong ba ia ka jingthoh kaba nyngkong kila ai ha u myntri rangbah barim ka jylla u bah EK Mawlong ha u snem 2000, kila ai ruh ia kajuh ka jingthoh sha ki myntri rangbah kiba wan hadien jong u bad ha kane ka sorkar mynta kaba la ialam da u Conrad K. Sangma kila ai ar sien.
U la iathuh ba shuwa ban ioh ia ka jylla Meghalaya ki don ha ka jylla Assam dei ha u snem 1951 la phiah ia ki ha ka United Khasi-Jaintia Hills Autonomous District Council bad sha ka Karbi Anglong Autonomous District Council bad haba la ioh ia ka jylla Meghalaya ha u snem 1972 kila hap ha Meghalaya hynrei wat la ki dei ki trai jylla ka sorkar kam shym la ithuh kum Schedule Tribe ne ki Riewlum kane ka jylla kumba long ki Khasi, Jaintia bad Garo.
U General Secretary ka ATSU u la ong ba ha kane ka jingwan mynta ka sngi ban pynsngew ia ka jingdawa jong ki ban ioh ia ka syrnot Schedule Tribe kam dei tang na ka seng samla pule hynrei la don lang na ka synjuk ki rangbah shnong, na ka Dorbar Raid ka hima Khyrim, ia kaba u Syiem ka Hima u la dep ban ai ia ka jngpynshisha bad ki dei ruh ki nongthep vote ka jylla Meghalaya, katne la pynshisha balei ka sorkar ka dang pynslem.
Kum ka jaidbynriew Tiwa ia kaba la tip ruh ia ki kum ki Lalung kin pyndonkam ia baroh ki lat ki lynti kaba don ha ka riti synshar ban ialeh ban pynioh ia ka hok ka jong ki namar ki dei ki riewlum jong kane ka jylla Meghalaya ka jingdawa ka jong ki ka long ba ka sorkar ka dei ban ithuh noh ia ki kum ki Riewlum ka jylla Meghalaya.
