Shillong, Jylliew 06: Ka seng ka la pynpaw ba “Katkum ki jingbthah jong ka sorkar, ki khynnah kiba hapoh hynriew snem bad ki kynthei kiba armet bad kiba ai buin ki don hok ban ïoh ïa ka jingbam ba pyndap na ka bynta 25 sngi ha ka shibnai, kynthup ïa ki jingbam ba la shet man ka sngi bad ki jingbam mynstep na ka bynta ki khynnah kiba dang 3–6 snem ha ki Anganwadi centre.
Hynrei katkum ki jingujor naki ba bun ki shnong kynthup iaka Khliehriat la Ong ba ki jingbam ki ioh tang shisien ha ka shibnai, ar ne wat lai bnai, bad ym don jingbam ba la shet ne jingbam step na ka bynta ki khun jong ngi.
Kane kam dei ka “jingbakla kaba rit” ha ka liang ka jingioh myntoi hynrei ka dei ka jingkyntait beit ia ki hok ba kongsan jong ka jingbam na ka bynta ki khynnah bad ki longkmie ba armet”.
Ka seng kala Ong ba, Ha ki jingiakren jong ngi bad ka CDPO, la pyni ba ki jingpynbiang bad ki jingpynrung pisa la kynnoh ba ki poi sha ka distrik tang shisien ha ki ar ne lai bnai, kaba pynlong ia ka ban ym lah ban bud ia ki kyndon.
Lada kane ka long kaba shisha, ka pynpaw ia ka jingbymlah jong ka rukom treikam ha ka kyrdan jong ka jylla,district. Lada ka long kaba bakla, ka buh jingkylli kaba khia halor ka jinglong hok jong ka jingpyntreikam bad jingai jingtip ha ka jaka. Ha baroh ar tylli ki khep, dei ki khun khynnah bad ki longkmie jong ka East Jaiñtia Hills kiba shem jingeh.
Ka JNC kala dawa ïa ka jingtohkit halor ka jingpyntreikam ïa ka SNP ha East Jaiñtia Hills, kynthup ïa ka jingkheiñ jingdiah man u bnai ïa ki mar bam ba la ïoh na ka jylla bad ki jingsam ba la leh sha man la ka jaka Anganwadi.
Ka seng kala kyntu ia u Deputy Commissioner ban pynthikna ba ka jingkitkhlieh kan long kaba la buh thikna. La ka long ha ka kyrdan district ne jylla, bad ba dei ban shim ia ki lad pynbeit mardor khnang ba ka skhim kan treikam kumba la kular ha ka policy, ym tang ha ka kot.
Ka JNC kren shai ba ka shai kan ïai buddien bha ïa kane ka kam. Ka jingdawa jong ngi ka long kaba shai bad kaba ym dei ban shim sting, khnang ba ki khynnah bad ki kmie hakq thaiñ ki dei ban ïoh ïa ka jingbam bad ka jingbam kaba long ka hok jong ki, man la u bnai, ha man la ka shnong.
