Shillong, Naitung 08: Mynta ka sngi ka seng Khasi Students Union (KSU) kila ia kynduh ia u Chief Executive Members jong ka Khasi Hills Autonomous District Council u bah Winstone Tony Lyngdoh bad ha kane ka jingiakynduh kila ia kren halor ki lai tylli ki mat bad kaba ha khmat eh dei ia u Uranium.
Na ka seng kala ong ba dei ban wanrah ia ka rai hapoh ka iing dorbar hapoh ka iing dorbar ban khang lad ban tih ïa u uranium ha ka jylla bad ba nym ai ïa ka No Objection Certificate (NOC) da lei lei ruh halor kane ka bynta.
Watla, kum ka jaidbynriew don hapoh ka jingïada jong ka Sixth Schedule bad ki paidbah ki long trai ïa ka jaka bad ha kajuh ka por long trai ïa ki mar ba hapoh khyndew hynrei ngim lah ban tip ïa ka aiñ ha kaba ïadei bad kane ka bynta namar lehse ka Sorkar India kan lah ban wanrah ïa ka jingïapher hapdeng ka “National Security” bad “Tribal Autonomy”.
Ka Atomic Energy Act, 1962 ka ai bor pura ïa ka Sorkar Pdeng ban shimti ïa ki ‘atomic minerals’ kum u uranium katba ka sngew dei ban leh.
Ka seng ka kyntu ban wanrah ïa ka Amendment ha ka “The Khasi Hills Autonomous District (Regulation bad Administration of Land) Act, 2021” ne lehse ban thaw da kawei ka aiñ katkum ka Paragraph 3 jong ka Sixth Schedule ba nym shah ban die, ai ai wai (sale /transfer/ lease) ïa ki jaka ba don u uranium sha ka sorkar ne ka kompeni ne briew shimet ban tih ïa u mar hapoh khyndew uranium bad kiwei radio-active elements.
Ban ai jingbthah sha ki Dorbar Shnong ki Dorbar Hima ba kin nym ailad ïa ki briew bad ki heh ophisar bad kiwei ki briew kiba na AMD ba kin ïoh rung sha ki thaiñ jong ka South West Khasi Hills District bad West Khasi Hills District, ha ki jaka ba don uranium. Kane kan pyntlot bad pynduh ïa ka jingthmu ba sniew jong ka Sorkar India bad ki briew kiba kwah shim kabu ban tih ïa u uranium.
