Shillong, Naitung 08: U president jong ka Seng Hynniewtrep Youth Council u bah Roykupar Synrem u la ong ba ka sorkar, ka Shillong Contonment Board ki dei ban weng mardor ia ki briew ba sha beain ha Lum Survey.
Haba kren ha ki lat pathai khubor mynta ka sngi u la ong ba hadien ka jingwad bniah jong ka seng haba iadei bad ka jingkam ba don ka mokotduma ia katei ka jaka la shem ba ka mokotduma ka dei tang ia ki lai tylli ki dukan kiba don hajan surok.
Dei halor kane ka seng ka daw aba ki bor sorkar bad ka Shillong contonment Board ki dei ban weng noh mardor ia ki iing bala shna beain ki bym duna ia ki 100 tylli eiei ha katei ka jaka, lada ki bor ba dei khmih ki sngap mynthi ka seng ha ki khyndiat sngi kan sa leh ia kaba donkam.
Ka sorkar bad ka Shillong Cantonment Board bad ki pulit ki tip shai kdar ba kane ka jaka ka dei ka kthem khaii drok bad ia kane ki pulit man ba ki leit khynra ha kane ka jaka ki ioh ban kem ka jingkylli kaba kum ka seng ka buh hato don eiei mo sha lyndet ba ym lah ban pynkhuid ia kane ka jaka.
Ka seng ka iohi na ka jingioh kem ki pulit ia ki nongkhaii drok ba ka lah ban don ka jingiadei hapdeng ka Them Motor bad ka Lum Survey ka don ruh ka jingsuba ba ka pisa khaii drok ka lah ban kot hajar klur tyngka bad imat ka lah ban dei namar ba ia ka kthem khaii drok ha Lum Survey ym shym la lah ban pynpra ia ki iing kiba la shna beain ha katei ka jaka.
