Shillong, Naitung 28: Ki bor jong ka District Administration ka East Khasi Hills kila ai jingmut sha ka sorkar jylla ban shna surok na Keating Road da kaba tap slep ia ka nala kaba mih sha Them Bijoy.
Kumba ka long baroh kila ia kren ia ka jingdheng kali ha kane ka nongbah Shillong khamtam eh ha ki bynta jong ka Khyndailad, G.S.Road,bad ka surok Shillong Jowai na Civil Hospital Shillong haduh jingkieng Nongthymmai, kine ki dei ki jaka kiba jur bha ka jingdheng kali kaba man ka sngi.
Ki bor jong ka District Administration ka East Khasi Hills kila wad ki lad ki lynti ban ioh ban shna surok lada don ka lad ban pynduna ia ka jingkhapngiah kali khamtam ha ki bynta jong ka Khyndailad bad Motphran namar kane ka surok G.S.Road ka iaid lyngba ki ar tylli ki iew kiba heh duh ha Meghalaya ka Police Bazar bad Iewduh.
Ha kane ka jingiawad lad wad lynti ki bor ka Disrtict Administration kala shem ba kan iarap ia ka jingkhapngiah kali ha G.S. Road naduh Secretariat sha Motphran lada lah ban pynkylla surok da kaba tap slep ia ka nala kaba tuid na Keating Road kaba poi sha them Bijoy kane kan iarap ban pynduna ia ka jingkhapngiah kali ha kane ka surok.
Katkum ki thymmei khubor kiba u SP News Agency u la ioh la iathuh ba na ka liang ka District Administration kala ai jingmut sha ka sorkar ban pynkylla surok ia katei ka nala na Keating Road kaba poi sha Them Bijoy bad ha ka jingiohi ka District Administration kan iarap ban pynduna ia ka jingkhapngiah kali ha kaba ki kali ki ban iaid sha iew kin iaid noh na katei ka jaka lada pynkylla surok noh ia ka nala.
