Ampati, Naitung 28: Ka District Administration, South West Garo Hills, kala pynlong iaka prokram pynrung kyrteng kaba shi sngi na ka bynta u Aadhaar, jingkha bad jingiap bad kiwei kiwei ki rukom treikam ha kylleng kane ka distrik.
Ia kane ka sienjam la pyntreikam hapoh ka Chief Minister’s Catalytic Fund na ka bynta ban pynurlong iaki jingtyngkai ba iaineh. Ka thong jong ka long ban wallam iaki shakri ba donkam halor ki syrnot pynshisha bad ki jingset kyrteng shajan ki paidbah, khamtam ia kito kiba shong ba sah ha ki jaka ba kham pajih bad ki jaka bym pat biang ki lad ki lynti, ryngkat ka jingpynshisha ba ki nongioh jingmyntoi kiba bit ki iadei bad ki skim ka sorkar lyngba ka jingpyniasoh bad u Aadhaar.
Iaka thup pynrung kyrteng ba nyngkong la pynlong ha Nogorpara PHC ha ka sngi nyngkong, kaba la ioh iaka jingkyrshan na u paidbah.bad jan 1000 ngut ki briew kila ioh ia kane ka lad ba la tyrwa hapoh kane ka kamp.
Kane ka jingpynrung kyrteng kala pynbit pynbiang iaki nongshong shnong ban pynioh iaki kam kiba donkam ha ka juh ka jaka. Kine ki kynthup iaka ban registar iaki jingkha, jingiap bad ka jingioh iaki syrnot Non-Availability Certificate (NAC). Nangta, ka kynthup ruh iaka ban pyniasoh bad pynbiang iaka Aadhaar bad ki dkhot longiing na ka bynta ki skhim kiba iadei bad ka bha ka miat u paidbah.
Kine ki kamp ki long ruh kum ka rynsan ban pynsngewthuh iaki paidbah halor ka jingdonkam ban registar iaki jingkha bad jingiap ha ka por kaba biang. La pynsngewthuh ruh iaka jingdonkam ban pyniasoh iaki record bad ka Aadhaar khnang ban ioh iaki jingshakri paidbah bad ki jingmyntoi na ki skhim bapher bapher.
Kum kane kajuh ka jingpyn rung kyrteng, la pynlong ruh ha Betasing PHC ha ka 31 tarik, Naitung bad ha Garobadha PHC ha ka 14 tarik, Nailar. Na ka liang ka District Administration kala kyrpad iaki nongshong shnong jong kato ka shnong ba kin shim ia kane ka lad bad leit pynrung kyrteng ialade ha ki kamp ba don hajan ha ka tarik ba la buh.
Ki nongshong shnong, khamtam kito ki bym pat pyndep iaka jingpynrung kyrteng iaki jingkha ne jingiap hapoh ki longing longsem, kito ki bym pat shon Aadhaar, ne ki bym pat pyniasoh iaka Aadhaar bad ki skhim jingiarap ka sorkar, ki dei ban wanrah bad ki ki kot ki sla ki babiang khnang ban long ka jingtreikam kaba tista bad kaba iaid beit.
Ki ophisar kila pyntip ba kane ka sienjam ka long shi bynta na ka jingpyrshang kaba ryntih ka distrik ban pynkhlain iaki rukom pynrung kyrteng shnong, ban pyniar iaka jingshakri paidbah bad ban wanrah iaka jingiashon bynta kaba kham bun hapoh ki prokram jingiarap ka sorkar.
Ryngkat ka jingrah ia kine ki jingshakri sha khmat ki paidbah, ka bor pyniaid distrik ka thmu ban pynthikna ba yn nym don uwei ruh u nongshong shnong uban shah iehnoh na kine ki hok kiba iadei bad ka jingpynithuh kyrteng, ka jingpynrung kyrteng bad ki jingmyntoi na ki skhim ba pynioh jingmyntoi.
