Shillong,Naitung 28: Ka jingiakhun hapdeng ka Meghalaya Police FT bad ka Rangdajied United FC ha ka lympung ialehkai jong ka Shillong Premier League 2026 ka Shillong Sports Association ba la long hynne ka janmiet ha SSA Stadium ka la kut noh hapdeng ka jingiakhaid kaba long da mar shi kol.
Haba phai sha ka jingiathep kol, dei ka Rangdajied United FC kaba la ioh ba kan pynkhih nyngkong ia ka jar kaba la thep lyngba u Dameki Khongstia (20’) ia kaba na ka liang ka MLP FT la pynphai kylla noh ia kane ka shi kol lyngba u Pynshailang L Lyngkhoi (53’).
Kum ka kynhun ka MLP FT na kawei ka samoi sha kawei pat ka long ka kynhun kaba iakhun beit ha ki kyrdan ba kham shalor bad dei tad ha u snem 2018 ba kum ka kynhun ka la hiar noh na ka SPL ha u snem 2018, pynban ha ka samoi ialehkai kaba la dep, ka la lah ba kan kiew biang sha kane ka lympung iakhun hadien ba ka la lah ba kan bat ia ka kyrdan kaba ar na ka lympung ialehkai ka First Division.
Ha kane ka kynti iakhun kaba mynta, ka MLPFT ka la lah ba kan sei madan kham bun da ki juh ki rang ialehkai, ha kaba ki kato katne ki rang ialehkai kiba ka la pynrung sha la ka jong ka kynhun ki dang don hapdeng ki kam ia kilan jong ka kam (training), kaba shiban ka donkam bha ia kine ki rang ialehkai ba kin wanphai sha ka kynhun ialehkai, kum shi bynta ban nang pynkhlain bad kiban lah ruh ban lah wat tang ha kaban iai neh shwa ialade ha kane ka lympung mynta ka samoi.
Haba phai sha ka jingiakhun, ka khana ka long ha ki ar bynta, kata ba ka kylla step, ka sur ialehkai kaba tbit bha ka la wan ba kan mih paw na ki khynnah ka Rangdajied United FC, kiba la sei madan ia kata ka rukom ialehkai kaba itynnad, kaba ha kum kane ka sur ialehkai, ka la pynklumar hi thlim ia ki rang ialehkai ka MLP FT.
Ka jingioh ka Rangdajied ban thep ia kane ka shi kol ka jong ki ka jia long ba u rang ap kol ka MLP FT u Eveningstar Bareh um shim la don ha ka jaka kaba u dei ba un don, ha kaba um shim la lah shuh ban ioh ban kyrda ia ka bol kab ala shut da u Dameki.
Pynban shwa ba ka jingiakhun kan khreh ban jam sha ka jingiashong thait ba shipor, ka MLP FT ka la sdang ban kham kyntiew ia la ka jong ka rukom ialehkai bad sdang ban kham nion shakhmat ia ka jingiakhun.
Kane ka sur ialehkai ba kham bha ka MLP FT ka la iai bteng pat ha ka kylla miet, kaba naka por sha ka por, ki khynnah ialehkai ka Rangdajied United FC, ki la hap ban long kiba phikir bad ban peitngor bha ia man la ki khep iba ki rang ka MLP FT ki iakhun ha madan, katno tam lei lei haba ki la sdang ruh ban tynjuh borbah bha ia ka kut ialehkai ka jong ki
Hynrei ha kaba kut, ki ar kynhun kin hun ka mynsiem ba kin ioh ba kin iakhur mar shi point bad ba kin phai khmat pat ialade naka bynta ki jingiakhun kiban sa wan.
Lashai pat ka sngi, ka jingiakhun kan long hapdeng ka klob ba la rah la san sien ia ka nam lahduh kane ka lympung ka Shillong Lajong FC kaban iakhun pyrshah ia ka Nangkiew Irat FC, kaban long ha ka por 4:00 baje nohphai sngi.
