Shillong, Naitung 08: U symbud myntri rangbah ka jylla u bah Sniawbhalang Dhar u la ong ba ka sorkar kala bthah ia baroh ki Chief Executive Officer ha ki distrik ba don ia ka Municipal bad ki jaka kiba don ia ka Town Committee bad kumjuh la pyntip sha ki MLA jong kito ki jaka ba ka sorkar ka kwah ban don noh ia ka ki jaka bret niut.
Haba phai sha ka Nongbah Shillong ka sorkar kala iakren ia ka jaka ha Nonghali hynrei namar ba u wei na ki nongshong shnong u la ujor noh sha iingkashari bad kane ka kam ka lah sah teng wat haba ka sorkar kala long kaba la kloi ban shim ia ka rai ha ba iadei bad kane ka jaka.
Ki jaka kiba don ia ka Municipal ki dei ka Williamnagar, ka Tura, ka Jowai,bad ka Shillong, katba ka Nongpoh ka don ia ka Town Committee u symbud myntri rangbah ka jylla u la iathuh ba ka sorkar kala dep mang pisa 5 klur tam ban siew ia ka bai jaka ha Nongpoh ban ioh ban bret niut bad ka kam ka dang iaid sha khmat mynta.
La ong ba la bthah ruh Ia ki ophisar jong ka Khliehriat ka Nongstoin ba kine ruh ki dei ban don ia ka jaka bret niut haba iadei bad ka Jowai ka dang don hapdeng ka jingpynbeit haba iadei bad kane ka kam.
