Shillong, Naitung 24: Ha kane ka iew National Seller and Buyer Meet 2026 nalor ki mar bapher bapher kiba la wanrah na ki jylla ban wan die ha kane ka iew kaba duna eh ki mar kiba wan die ka dei ka ngap bad kiba wan die ki don tang lai tylli ki dukan bad baroh lai tylli ki dei na Meghalaya.
U wei u rangbah na ka shnong Mawten kaba hap ha South West Khasi Hills District la iathuh u la sdang ban ri ngap naduh u snem 2007 bad haduh mynta u la buh 150 tylli ki ksing ngap bad u da sngewkmen ba ha kine ki snem u la shah hikai pyntbit ha kaba iadei bad kane ka kam ri ngap.
Ka jinghikai kaba u la ioh na ki jaka hikai jong ka sorkar ka long ba u la lah ban shna hi da lade ia ki ksing ngap kiba katkum kane ka juk kaba mynta bad kaba kham pynhun eh ia u na ki jinghikai kiba u la ioh ka long ba u la lah mynta ban pynmih na ki ngap ia ka kiaw ngap bad kane kala pynsuk kumno ban pynkhlain ha kane ka kam ri ngap.
U ne u rangbah u la ong ha kaba sdang um shym la poi pyrkhat ba kane ka kam kan ai jingmyntoi ia ka iing ka sem hynrei mynta u shem ba kala ai shisha ka jingkyrshan ia ka kamai kajih ha ka iing ka sem bad u kyntu ia baroh ban shim ia kane ka kam ri ngap kum kawei na ki lad kamai.
Haba iadei bad ki ngap une u rangbah na ka shnong Mawten u la ong naduh u snem 2007 ba u sdang ri ngap u shem ba kam don kata ka jingiap jong ki ngap hynrei na kiei ki daw ba ym lah ban tip dei hadien u snem 2020 ba kala sdang ka jingiap jong ki ngap bad ia kane la pyntip ruh sha ki tnat sorkar kum ka Horticulture bad ka District Industries Centre.
