Shillong, Naitung 23: Ha ka 21 tarik u Naitung 2026, ka Khasi Students’ Union (KSU), lyngba ka Education Cell, Central Executive Council, ka la pynkup burom ïa lai ngut ki samla pule kiba la lehbha ha ka eksamin Joint Entrance Examination (JEE Advanced) bad kiba la ïoh rung sha ki Indian Institutes of Technology (IIT).
U Samla Richbhalang Kharshiing u la ïoh ïa ka kyrdan AIR 15 (ST Category) bad u la ïoh rung ha ka tnat Computer Science and Engineering (CSE) ha IIT Bombay, kaba long kawei na ki shlem pule ba pawnam tam ha ka ri India.
Kumjuh ruh, u Samla Dasannaki Bareh Lyndem u la ïoh ïa ka kyrdan AIR 281 (ST Category) bad u la ïoh rung ha ka tnat Mathematics and Computing (MnC) ha IIT Indore.
Nalor kine, u Samla David Bajop Christopher Gatphoh u la ïoh ïa ka kyrdan AIR 461 (ST Category) bad u la ïoh rung ha ka tnat Electrical Engineering ha IIT Indore.
Na ka liang ka Khasi Students’ Union, ngi dap da ka jingsngewkmen bad jingsarong ban pynkup burom ïa kine ki samla pule kiba la wanrah nam bad burom ym tang ïa la ka longïing hynrei ïa ka jylla bad ïa ka jaitbynriew Khasi hi baroh kawei. Ngi ai jingïaroh ïa ka jingtrei shitom ka jong ki bad ngi kyrmen skhem ba kane kan long ka jingïalam lynti bad jingai mynsiem ïa kiwei pat ki samla pule ban trei shitom, ban trei minot bad ban kiew shaphrang ha ka pule puthi.
Ngi kyrmen ruh ba ha ki snem bad ki por ban wan, kin dang mih shuh shuh kiba bun ki samla kiba don ka sap bad ka jinglah ban wanrah nam bad burom ïa ka jylla bad ïa ka jaitbynriew lyngba ka jingjop ha ka pule puthi bad kiwei pat ki bynta jong ka jingim.
