Shillong: Ka lympung ialehkai karate ki skul ba la tip ia ka kum ka 32nd State Level Inter School Karate Tournament 2026, ia kaba la pynlong ia ka da ka All Meghalaya Karate Do Association (AMKA), la sdang ia ka naduh mynta ka sngi ka 23 tarik u Naitung ia kaba la pynlong ha Multi Purpose Indoor Hall, ka SAI, STC, NEHU, Shillong.
Ha kane ka kynti kaba mynta ki skul, baroh ba la wan ban iashim bynta ki long haduh 126 tylli bad ki khynnah kiba ialehkai ki la kynjoh sha ka 802 ngut kynthei bad shynrang.
Kongsan ba la leit ban plie ia kane ka jingialehkai dei u Co-Chairman ka Meghalaya State Planning Board ba dei artad u Working President ka Meghalaya State Olympic Association (MSOA) u bah John F Kharshiing, bad symbud kongsan dei u General Secretary ka MSOA bah Finely. L. Pariat, bad la iadon lang ruh u Jt Secretary MSOA bah P.Laloo lem bad kiwei kiwei ki riew pawkhmat bad kumjuh ki nongialam bad ki nongkit kam jong ka AMKA.
Ha ka jingialang plie, ka la don ruh ka jingpynkup burrom ia ki arngut ki khlur ialehkai kiba dang ha ka taiew kaba la dep ki la lah ban khur ia ka takma ksiar bad takma rnong na ka rynsan ialehkai jong ka 10th Cadet Junior, U-21 & Senior South Asian Karate Championship 2026 ba la long ha nongbah Dhaka, Bangladesh naduh ka 15-19 tarik mynta u bnai.
Kine ki arngut ba la pynkup burom ia ki da u Kongsan bad symbud kongsan ki long u Daniel Dabiangbha Warjri ba la khur ia ka takma ksiar na ka Boy’s Junior-68 KG bad u Gideon Tympuin ba la khur ia ka takma rnong na ka Men U-21 Indiviadual Kata.
Haba iadei bad kane, na ka liang u bah Finely u la pynbna ruh ia I song khusnam pisa ba long mar 5 hajar tyngka lyngba ka MSOA sha kine ki arngut ki khlur ialehkai karate jong ka AMKA.
Ha shwa ban sdang shakhmat ia ki jingiakhun baroh, ka la don ka jingpule ia ka kyntien bam smai ba la lam khmat da u Daniel Dabiangbha Warjri bad hadien kane u kongsan u la shim pat ia ka bynta ban pynbna ia ka jingplie ia ka pyrda kane ka jingiakob.
