Shillong, Naitung 24: Ka jingiakynduh lang hapdeng ki nongthied bad nongpynmih tiar ka thain Shatei Lam Mihngi kaba kynthup ia ki phra tylli ki jylla kaba la tip kum ka National Seller and Buyer Meet 2026 kala long mynta ka sngi 24/Naitung /2026 ha State Convention Centre.
Baroh ki jylla ka thain Shatei Lam Mihngi, ka Sikkim, Assam, Arunachal Pradesh, Manipur, Mizoram, Tripura bad Meghalaya kila wan ban ia shim bynta ban pyni ia ki tiar ba la shna tynrai na kitei ki jylla ha ka iew kaba ar sngi.
Ha kane ka iew kaba ar sngi ki briew na ki jylla ka thain Shatei Lam Mihngi ki tiar kiba kila buh ha ki dukan jong ki, kiba bun ki dei ki jain ba la thain da ki kti katkum ka jinglong tynrai jong ki briew ha kato ka jylla ia kaba la jan baroh phra tylli ki jylla kila wan ban die ia ki jain ha kane ka iew.
Ka kong Rabeka Nongrum na ka shnong Umdohkha na Ri Bhoi Distrik, haba kren ha u S.P. News Agency kala iathuh ba kala sdang ia kane ka kam ha u snem 2000 da ka jingkyrshan na ka tnat thain jain ka sorkar jylla ha kaba kila ai ia ki mashin bad ia ki iing ban thain jain, bad kila thain ia ki jain kiba bun rukom na u ksai ryndia bad kynphad.
Haba phai haba iadei bad ka iew naduh ba sdang haduh u snem 2015-2016 ka iew ka biang namar ba ki tnat sorkar ki thied ia ki jain na ki bad haduh u snem 2022 ruh ka iew ka dang biang hynrei hadien jong kane ka iew kam biang shuh lait noh tang ba ki ioh ban wan die ha kine ki iew pyni nam.
Ka kong Rabeka kala ong ba lada long kaba lah lada ioh ia ki exhibition kiba man ka por kin kham lah ban die bad haba lah ban die ki lah ban pynbit pynbiang ia ka iing ka sem, ha kane ka kam thain jain mynta ki don hynriew ngut saw ngut ki khun bad ar ngut kiwei pat kiba ki khot trei kila iathuh ba mynshuwa ki don saw ngut kaba ki khot trei hynrei la hap ban pynpep noh ar ngut namar ka jingbymbiang shuh ka iew ka hat.
