Shillong, Naitung 24: Ka North East Students’ Organization (NESO) ha ka jingai jingkren jong u Secretary General ka NESO, u Mutsikhoyo Yhobu bad u Chairman ka NESO, u Samuel B. Jyrwa, kila pynrem jur iaka jingthombor ba shyrkhei bad pyndonkam bakla da ka bor jong ki pulit pyrshah iaki samla pule kiba la iashim bynta ha ka jingialang ba jai jai ha ka nongbah New Delhi ha ka 20 tarik, Naitung 2026.
Ha katei ka jingialang, la iohi ba ki pulit kila pyndonkam da u dieng jong ki pulit, tear gas bad ka jingphah da ki pulit ba phong jain lieh kiba la rah da ki lathi ban bom pyrshah iaki samla pule ki bym shym la don tiar jingpyn mynsaw ba ki rah ha ki ha kaba katei ka pyni iaka jingthombor kaba da jubor kaba long ka jinghiar thma halor ki dor ka synshar paidbah bad ki hok longtrai katkum ka riti synshar ri jong ki nongshong shnong ban iaseng bad ban pynpaw iaki jingud kiba dei hapoh ka jingsuk.
Kumta ka NESO kala pynrem jur iaka sorkar India iaka jingbym lah ban teh lakam ia katei ka jingjia kaba la ktah beit beit iaka lawei jong ki million ngut ki samla pule bad ki samla ba thrang ban pule ha kylleng ka ri. Ha ka jaka ba kin iakren halor katei ka mat da kaba jai jai bad ki samla pule, hynrei ki bor synshar kila pyndonkam da ka jingpynshitom bein bad jingpyntieng.
Ki mat jingdawa jong ki samla pule ba iakhih ki kynthup iaka jingmih lypa ka kot jingkylli ha ki jingiakhun eksamin, ka jingdonkam kloi ia ka jingshai, ka jingkitkhlieh, ka jingbha bad ka jingpaw ha ki rukom thung kam bad pynlong iaka jingiakhun eksamin kaba shongnia bad kaba donkam ban pynbeit mar mar. Ka jingangnud bad ka jingtrei shitom ki khynnah kiba ialeh tyngeh, kim dei satia ban shah ngat ne shah pynduh bad shah len namar ki jingtlor ka rukom treikam, ka bamsap, ne ka jingkhein poh ka kynhun synshar.
